Fransiya chempionati erta to‘xtatilganda umuman noto‘g‘ri qaror dedik. Bundan chempionat klublari yukazadi, adolatsiz bir yakun bo‘ladi, deb bildik. Ammo, mana ma’lum bo‘lyaptiki, buning ijobiy jihatlari ham bor. Albatta, "PSJ" va "Lion"ning natijasini faqatgina tejalgan vaqt oqibatida yuzaga kelgan jismoniy tetiklik bilan o‘lchash noto‘g‘ri bo‘ladi. Biroq, "Atalanta" charchab qolganini o‘sha kuni aytgandik, "Manchester Siti"chi, unga nima yetishmadi? Omadmi? Bu omad deganlari kuchlilarga kulmasmidi? Xullas, qiziq mavsum bo‘lyapti. 2020 yil bizga boshqachasini taqdim etolmasdi ham o‘zi.

Rudi Garsiya jamoasini "Yuventus"ga qarshi ikkinchi o‘yindan so‘ng maqtaganman. Juda muvozanatli harakat qiladi. Boshqalardan ajralib turadigan rangi yo‘q. Ammo 90 daqiqani qismlarga bo‘lib, kuchni taqsimlay biladi bu klub.

Yarimfinal uchun afishalar barbod bo‘ldi, deyishyapti. Balki shundaydir. Lekin, menga yoqyapti bo‘layotgan ishlar. Futbol bu, azizlar — janobi oliylari futbol.

UzReport TV va Futbol TV e’tiboringizga bu ajobtovur voqeylikni taqdim etishda davom etadi.

Orif Tolipov.