Superliganing 10-turi doirasida AGMKga (3:1) qarshi o‘yindan keyingi matbuot anjumanining birinchi qismida «Lokomotiv» bosh murabbiyi Andrey Fyodorov o‘z fikrlarini bildirib o‘tdi.

— O‘yin haqida gapirish qiyin. Ikki xil taymning guvohi bo‘ldik. Birinchi bo‘limda futbolchilar murabbiylar yuklagan ko‘rsatmalarni bajara olishdi. Ikkinchi bo‘limda jarimadan urilgan gol esa barchasini o‘zgartirib yubordi. Golda o‘zimiz aybdormiz. Shuning ortidan tashabbus AGMK tomoniga o‘tib ketdi. O‘zgarishlar orqali o‘yinni kuchaytirishni niyat qilgandik. Biroq bu umumiy holatni yomonlashtirib yubordi. Bizdagi eng katta muammo — tarkib. Kasallangan, jarohatdagilar ko‘p. Shuningdek, asosiy futbolchilarimiz ham jamoani tark etishdi. Iloji boricha tezroq qaytishga harakat qilamiz.

— Ignatiy Nesterovning ketishi haqida gapirsangiz. Bu uning qarorimi yoki klubning?
— O‘zining qarori. Umuman olganda futbolchining jamoasini o‘zgartirish futboldagi oddiy holat. U «Lokomotiv» uchun ko‘p narsalar berdi va ketishga qaror qildi. Qarorni hurmat qilamiz. Uning ketishi bizga unchalik ta’sir qilmasa kerak. Kayfiyat unchalik yaxshi emas. Yigitlar kambek qilishga qiynalishmoqda. Bu borada ham ishlaymiz.

— Klub aktivlarini agentlik sotib olganini eshitdik. Bir necha klub bir agentlikning ixtiyorida bo‘lishi OFK qaroriga zid. Umuman olganda klub hususiylashmoqda. Bunga fikrlaringiz.
— Klubning xususiylashishi juda yaxshi holat. Bunga roziman. Shu orqali klublarni ham kuchaytirish mumkin.