Superliganing 12-turi doirasida bo‘lib o‘tgan "Paxtakor" - "Lokomotiv" bahsidan keyin "sherlar" yarim himoyachisi Jaloliddin Masharipov o‘z fikrini bildirib o‘tdi.

"Murabbiy doim bizdan hushyorlikni yo‘qotmagan holda o‘ynashni talab qiladi. Chunki bu jamoaviy saviya o‘sib borishi, Chempionlar Ligasiga yaxshi tayyorlanishga yordam beradi. Bu o‘yinlar orqali unga hozirlik ko‘ryapmiz.

Mavsum davomida oyog‘im og‘rigani sababli bir oz qiynaldim. Ikkinchi karantin paytida jarohatimdan qutuldim va yana yuz foiz kuch bilan o‘ynashga o‘tdim. Hozir har bir uchrashuvda 90 daqiqadan to‘p tepishga tayyorman.

Xorijda o‘ynashni istayman, lekin hozircha bunga imkon bo‘lgani yo‘q. Oldimga kuchli chempionatda o‘ynash maqsadini qo‘yganman. "Paxtakor"da katta bo‘lganman, men uchun qadrdon klub hisoblanadi. Shu sababli barcha bilan kelishgan holda xorijga yo‘l olishni xohlardim. Masalan, o‘zbek futbolchilari bemalol Rossiya chempionatida o‘ynay oladi. Murabbiylar ishonch bildirsa yetarli. O‘yinchilarimiz salohiyati kuchli", — dedi Masharipov.