Xabaringiz bor, biroz avval saytimizda "Andijon" futbol klubi o‘z faoliyatini to‘xtatishi mumkin" sarlavhasi ostida xabar chiqarildi. Bu ma’lumotlarga aniqlik kiritish maqsadida jamoa bosh murabbiyi Viktor Kumikov bilan bog‘landik.
– Matbuotda "Andijon" jamoasi tarqatib yuborilishi haqida xabarlar tarqaldi. Bu qanchalik asosli?
– Afsuski, bularning bari haqiqat.
– Demak, jamoa keyingi turda "Paxtakor"ga qarshi maydonga tushmaydi?
– Ha!
– Klub ushbu mavsumda bir nechta g‘alabani qo‘lga kiritganida, rahbariyat klubni saqlab qolishga harakat qilgan bo‘larmidi?
– G‘alaba qozonish uchun hech bo‘lmaganda klubdagi sharoitni yaxshilash kerak.
– Futbolchilarning taqdiri nima bo‘ladi? Ular bilan gaplashdingizmi?
– Ba’zilarida takliflar bor, qolgani ishsiz qoladi.
– Klub butunlay tugatildimi yoki kelasi mavsumda Pro-ligada ishtirok etadimi?
– Bilmayman. Pul yo‘q deyishdimi, demak, tugatiladi.
– Jamoadagilar oxirgi marta qachon maosh olishdi?
– Uch oy oldin. O‘tgan yilgidan ham qarzdorliklar bor.
– Siz nima qilmoqchisiz? Sizda ham takliflar bormi?
– Uyga qaytaman. Hozircha hech qayerda ishlashni xohlamayman.
Jalolidddin Qobiljonov yozib oldi.
