Superligada birinchi davraning so‘nggi o‘yinida jamoamiz "Andijon" bilan maydonga tushadi.

Bellashuvni har ikki jamoadan bir nafardan futbolchi sariq kartochkalar diskvalifikasiyasi tufayli o‘tkazib yuboradi. "Paxtakor"dan Yegor Krimes, "Andijon"dan Usmonali Ismonaliyev maydonga tusha olmaydi.

Hozirga qadar jamoalar chempionatlarda 48 bor to‘qnash kelishgan. Ulardan 36tasida "Sherlar" g‘alaba qozongan bo‘lsa, 8 bahsda durang natija qayd etilgan. Faqat 4 marta "Andijon" futbolchilari muvaffaqiyatga erishgan. Raqib darvozasini 120 marta ishg‘ol qilgan jamoamiz 34 gol o‘tkazib yuborgan. Safardagi bellashuvlarda 14 g‘alaba, 6 durang va 4 mag‘lubiyatga egamiz. Mehmonda 45 to‘p kiritgan holda darvozamizdan 17 gol olib chiqqanmiz. Jami g‘alabalarning 15tasi raqib ustidan yirik hisobdagi natijalar bilan qo‘lga kiritilgan. O‘tgan mavsumda har ikki uchrashuvda "Paxtakor" yirik hisobda zafar quchgan - uyda 5:1, mehmonda 3:0.

O‘zaro o‘yinlar to‘purari Server Jeparov hisoblanadi. U andijonliklar darvozasiga 8 to‘p kiritishga erishgan. Sobir Xodiyev, Zayniddin Tojiyev va Baxtiyor Hamidullayev 7tadan gol urgan. Azamat Abduraimov va Leonid Koshelev hisobida 5ta to‘p bor. Ravshan Bozorov, Dilmurod Nazarov, Igor Sergeev hamda Dragan Cheran raqib darvozasiga 4 to‘p kiritishni uddalagan. Otabek Pirmatov esa har ikki jamoa uchun gol muallifi bo‘lgan.

"Andijon" va "Paxtakor" jamoalari o‘rtasidagi o‘yin 27 avgust, payshanba kuni "Lokomotiv" stadionida soat 19:00da boshlanadi.