Coca Cola Superliga 12-turidan o‘rin olgan "Surxon" - "Metallurg" (1:2) uchrashuvidan keyin mehmonlar ustozi Andrey Shipilov o‘z fikrlarini bildirdi.

"Ikkinchi restartni yomon boshladik. Oldingi ikki turda "hayotimiz shirin" bo‘lmadi. Birida ilk taymni yaxshi o‘tkazdik. Keyingisida ikkinchi taymda “to‘p surdik”. Bugun esa ikkala taymda ham yaxshi o‘ynay oldik. Yigitlar harakat qilishdi. Natija qanday bo‘lishidan qat’iy nazar bugun shogirdlarimning o‘yinidan qoniqqanligimni aytardim.

Ravshan Haydarovning imzosi ko‘rinib turibdi. Qisqa vaqt ichida uning falsafasi jamoaga singdirilgan. Bu kishiga qarshi kurash olib borish yoqimli bo‘ldi. Hisob tenglashganida yana gol ura olishimizga ishondim. Bugun mag‘lub bo‘lganimizda adolatdan bo‘lmasdi, sababi biz to‘pga egalik qildik va tashabbusga ega edik.

G‘alaba qozondik va noxush seriyamiz yakunlanganidan xursandman. Ketma-ket uchta o‘yinda ochko ololmaslik yomon bo‘lardi. Oldimizda hali qiladigan ishlar ko‘p. Keyingi turdagi raqibimiz "Mash’al" juda ham "jonli" jamoa. Keyingi o‘yinga katta mas’uliyat bilan tayyorgarlik ko‘ramiz.

Balki bugun chiroyli futbol bo‘lmagandir, ammo natija qo‘lga kiritildi. Ba’zida shunday ham qilish kerak. Futbol o‘ynashga harakat qilayapmiz.

Har bir mashg‘ulot va har bir o‘yinda professionalliklarini isbotlash kerakligini aytaman. Davron Anvarov o‘yindan-o‘yinga o‘z o‘yinini kuchaytirmoqda. Oldingi o‘yinlarda bir taymdan o‘ynayotgandik, professional futbolchilar esa ikki taym o‘ynashi kerak.

Bugun Chumak va Otaxonovning tug‘ilgan kuni edi. G‘alaba ularga ajoyib sovg‘a bo‘ldi. Ammo men bugungi g‘alabamizni jamoamiz shifokoriga bag‘ashlagan bo‘lardim. Sababi u so‘nggi haftalarda juda katta hajmdagi ishni bajardi. Aytish mumkin bo‘lsa mavsum oxirigacha shifokorimiz bosh murabbiydan ham muhimroq shaxsga aylandi. Unga katta rahmat aytmoqchiman. Bugungi g‘alaba uning g‘alabasi", - deydi Andrey Shipilov.