Coca Cola Суперлига 12-туридан ўрин олган "Сурхон" - "Металлург" (1:2) учрашувидан кейин меҳмонлар устози Андрей Шипилов ўз фикрларини билдирди.

"Иккинчи рестартни ёмон бошладик. Олдинги икки турда "ҳаётимиз ширин" бўлмади. Бирида илк таймни яхши ўтказдик. Кейингисида иккинчи таймда “тўп сурдик”. Бугун эса иккала таймда ҳам яхши ўйнай олдик. Йигитлар ҳаракат қилишди. Натижа қандай бўлишидан қатъий назар бугун шогирдларимнинг ўйинидан қониққанлигимни айтардим.

Равшан Ҳайдаровнинг имзоси кўриниб турибди. Қисқа вақт ичида унинг фалсафаси жамоага сингдирилган. Бу кишига қарши кураш олиб бориш ёқимли бўлди. Ҳисоб тенглашганида яна гол ура олишимизга ишондим. Бугун мағлуб бўлганимизда адолатдан бўлмасди, сабаби биз тўпга эгалик қилдик ва ташаббусга эга эдик.

Ғалаба қозондик ва нохуш сериямиз якунланганидан хурсандман. Кетма-кет учта ўйинда очко ололмаслик ёмон бўларди. Олдимизда ҳали қиладиган ишлар кўп. Кейинги турдаги рақибимиз "Машъал" жуда ҳам "жонли" жамоа. Кейинги ўйинга катта масъулият билан тайёргарлик кўрамиз.

Балки бугун чиройли футбол бўлмагандир, аммо натижа қўлга киритилди. Баъзида шундай ҳам қилиш керак. Футбол ўйнашга ҳаракат қилаяпмиз.

Ҳар бир машғулот ва ҳар бир ўйинда профессионалликларини исботлаш кераклигини айтаман. Даврон Анваров ўйиндан-ўйинга ўз ўйинини кучайтирмоқда. Олдинги ўйинларда бир таймдан ўйнаётгандик, профессионал футболчилар эса икки тайм ўйнаши керак.

Бугун Чумак ва Отахоновнинг туғилган куни эди. Ғалаба уларга ажойиб совға бўлди. Аммо мен бугунги ғалабамизни жамоамиз шифокорига бағашлаган бўлардим. Сабаби у сўнгги ҳафталарда жуда катта ҳажмдаги ишни бажарди. Айтиш мумкин бўлса мавсум охиригача шифокоримиз бош мураббийдан ҳам муҳимроқ шахсга айланди. Унга катта раҳмат айтмоқчиман. Бугунги ғалаба унинг ғалабаси", - дейди Андрей Шипилов.