Ushbu ruknimizdagi eng so‘nggi yangiliklar bilan tanishtirishda davom etamiz.
“Tottenhem”ga himoyachi kerak
Angliyaning “Tottenhem” klubi o‘ng qanot himoyasini kuchaytirmoqchi.
Kayl Pitersning “Sautgempton” safiga o‘tib ketishi va Serj Oryening “Milan” bilan muzokaralar olib borayotgani sababli “shporlar” zudlik bilan o‘ng qanot himoyachisi sotib olishi lozim.
“Football London” nashri bergan ma’lumotga qaraganda, klub nishonida “Vulverhempton” fulbeki Mettu Doerti turibdi.
28 yoshli irland klub safida 2013-yildan beri to‘p surib kelmoqda. U jamoa bilan 3-dviziondan APLga qadar ko‘tarildi va ayni damda o‘z nuqtasidagi eng yaxshi futbolchilardan biri bo‘lib turibdi.
Universal himoyachining “bo‘rilar” bilan tuzgan shartnomasi 2023-yilda o‘z yakuniga yetadi. “Tottenhem” uni qo‘lga kiritish uchun 10 milliondan voz kechishga tayyor.
Iguain APLda?!
Turinning “Yuventus” klubi forvordi Gonsalo Iguain faoliyatini APLda davom etiradigan ko‘rinadi.
“Le repubblica” nashrining ma’lum qilishicha, 32 yoshli argentinalik hujumchi bilan “Aston Villa” va “Vest Hem” klublari jiddiy qiziqib qolgan.
Eslatib o‘tamiz, “zebralar” ustozi Pirloning ma’lum qilishicha, Iguain ushbu yozda klubi erkin agent maqomida tark etadi.
“Benfika” jiddiy kirishdi
Portugaliyaning “Benfika” klubi Edinson Kavani bilan kelisha olmagach, bor e’tiborini “Real” hujumchisi Mariano Diasga qaratmoqda.
“Record” nashri bergan ma’lumotlarga qaraganda, “Burgutlar” Diasni qo‘lga kiritish uchun uni avvaliga bir mavsumga ijaraga olishni reja qilmoqda.
Manbaning ma’lum qilishicha, “qirollik klubi” dominikanlik hujumchini o‘z safida olib qolmoqchi emas va katta ehtimol bilan Mariano kelasi mavsumni “Benfika” safida o‘tkazadi.
“Lids”dan navbatdagi transfer
APLga qaytishini katta transferlar bilan nishonlayotgan “Lids” “Arsenal” himoyachisini nishonga oldi.
“Taem Talk”ning ma’lum qilishicha, “Lids” nishonida “Arsenal” himoyachisi Kelum Chembers bor.
25 yoshli himoyachini Mikel Arteta o‘z kelajak rejalariga kiritmagan. Shu bois, klub ingliz futbolchisini arzonroq summa evaziga ham qo‘yib yuborishi mumkin.
Manbaning ma’lum qilishicha, “Lids” ushbu himoyachini kelasi haftada 12 million funt evaziga sotib oladi.
