Xabaringiz bor, 3 sentyabr kuni O‘zbekiston milliy terma jamoasi Tojikiston bilan o‘rtoqlik o‘yini o‘tkazadi.

Ushbu uchrashuvga tashrif buyurmoqchi bo‘lgan OAV vakillari JCH-2022 Saralash bahslari uchun berilgan akkreditasiya orqali stadionga kirishlari mumkin.

Barcha turdagi OAV vakillari 29 avgust soat 17.00ga qadar media@ufa.uz elektron pochtasiga uchrashuvga tashrif buyurishni istagan xodimlari ro‘yxatini yuborishi so‘raladi.

Ushbu muddat ichida rasmiy tarzda xabar yubormagan OAV vakillari MTJ mashg‘ulotlari va O‘zbekiston - Tojikiston o‘rtoqlik o‘yiniga tashrif buyura olmaydi.

Pandemiya sabab yuzaga kelgan epidimiologik vaziyat tufayli OAV vakillaridan stadion hududida sanitariya qoidalari, normalari va gigiyena normativlariga amal qilishlari so‘raladi.

OFKning COVID-19 pandemiya sharoitida o‘yinlar tashkil etish protokoliga muvofiq, quyidagilarga taqiqlanadi:

- o‘yindan avvalgi matbuot anjumanini o‘tkazish;

- kiyinish xonasini tasvirga tushirish;

- o‘yindan avval va o‘yindan keyingi «stand-up» intervyular;

- mikst zonadan foydalanish;

- media markazdan foydalanish.

O‘yin kuni faqatgina teletranslyasiya (HB) muxbiri kamida 2 metr ijtimoiy masofa saqlagan holda, ikkala jamoa bosh murabbiyi va futbolchilaridan qisqa («flesh») intervyu olishiga ruxsat beriladi. Bunda muxbir tibbiy niqob va qo‘lqop taqishi, stendli yoki uzun tutqichli mikrofonlardan foydalanishi majburiy hisoblanadi.

O‘yindan keyingi matbuot anjumanida ovoz yozib olish qurilmalarini (diktofon, telefon va boshqalar) murabbiylar oldidagi stolga qo‘yishi taqiqlanadi. Bunda, stendli mikrofonlardan foydalanish tavsiya etiladi.