Avgust oyidagi o‘ziga xos "boksing dey" va chempionatning birinchi davra o‘yinlari yakunlanish arafasida.

AGMK ikkinchi bor qayta tiklangan chempionatda qisqa fursatda 3 uchrashuv o‘tkazib, unda 2 g‘alaba va 1 durang qayd etdi. "Buxoro"ga qarshi o‘yin 12 kun ichida o‘tkazilayotgan 4-uchrashuvga aylanadi.

"Buxoro" - AGMK qarama-qarshiligi tarixiga nazar soladigan bo‘lsak, ushbu to‘qnashuvda o‘zaro tenglik mavjud. Jamoalar hozirga qadar o‘tkazilgan 22 uchrashuvda teng hisobda, ya’ni 9 marotabadan g‘alabaga erishishgan. Qolgan 4 bahsda durang qayd etilgan. To‘plar nisbati AGMK foydasiga: 35-25.

Ayni paytda Qosimov jamoasi 28 ochko to‘plagan holda musobaqa jadvalida 2-o‘rinni egallab turibdi. Bo‘lajak o‘yindagi ehtimoliy g‘alaba AGMKga tarixda ilk bor birinchi davra o‘yinlarini mag‘lubiyatsiz o‘tkazish, mag‘lubiyatsiz seriya qayd etish bo‘yicha mutlaq rekord qo‘yish va ikkinchi davra oldidan egallab turgan 2-o‘rinni yanada mustahkamlash imkoniyatini beradi.