Portugaliya terma jamoasi bosh murabbiyi Fernandu Santush Millatlar ligasi doirasida Shvesiyaga qarshi bo‘lib o‘tgan o‘yin (2:0) borasida o‘z fikrini bildirdi. Har ikkala gol Krishtianu Ronaldu hisobiga yozildi. Shvedlar esa 44-daqiqadan boshlab maydonda bir kishi kam bo‘lib qolishdi.

«Dastlabki 20 daqiqada qiyinchilikka duch keldik. Biz ularning o‘yin uslubini tushuna olmadik. Keyin esa yaxshiroq o‘ynay boshladik. To‘pni nazorat qilib, shvedlarni ko‘p yugurishga majbur qildik. Shundan keyin ishimiz osonlashdi.

Chetlatish mazkur o‘yinda hal qiluvchi ahamiyatga ega bo‘ldi. Biz adolatli tarzda g‘alaba qozondik. O‘zimiz istagandek g‘alaba qozona olmadik, ammo biz o‘yinni nazorat qildik. O‘yinchilar kutilmagan qarorlarni qabul qilishi kerak edi. To‘pni tezroq harakatlantirsak, boshqacha natijaga erishishimiz mumkin edi», — dedi Santush.

Portugaliya va Fransiya terma jamoalari 6 ochko bilan A liga, 3-guruhda peshqadamlik qilishmoqda. Shvesiya va Xorvatiya terma jamoalari hisobida hali ochko mavjud emas.