Angliyaning «Manchester Siti» jamoasi yarim himoyachisi Kevin De Bryuyne “Daily Mail” nashri uchun bergan intervyusida Leonel Messining transferi haqida fikr bildirdi.

Kevin De Bryuyne:

“Ochig‘ini aytaman, Messining jamoamiz a’zosi bo‘lishiga ishonmagan edim. Agar uning Manchesterga ko‘chib kelishi uchun imkoniyati bo‘lganida, bu ish albatta sodir bo‘lgan bo‘lar edi. Sababi, u futbol olamining tirik afsonasi. Messi singari ijrochilarning jamoamizda bo‘lishi uchun rahbarlar qo‘lidan kelgan barcha ishni amalga oshirgan bo‘lar edi.

Sababi, Messi futbol olamidagi ulkan imkoniyatlar kaliti. Uni qo‘lga kiritishga moliyaviy qodir klublarning barchasi Leo tarkibida bo‘lishini istaydi. Bu tabiiy hol albatta.

Agar Messining transferiga biznes ko‘zi bilan qarasangiz ham bu «Manchester Siti» uchun yaxshi imkoniyat ekanligini darrov anglaysiz. Leoning transferi ortida ulkan reklama shartnomalari ham paydo bo‘lishi aniq. Agar «Manchester Siti» uning transferi va maoshi uchun millionlarni sarf etsa ham yakunda bu pullar sof daromad bo‘lib qaytishi aniq edi.

Futbolchi sifatida uning jamoamizda bo‘lishi yoki bo‘lmasligi haqida fikr bildirmoqchi emasman. Bizga buning umuman farqi yo‘q. Agar bu transfer amalga oshganida, «Siti»da katta g‘alabalar uchun imkoniyat yanada oshgan bo‘lar edi. Sababi, men Leo Messini barcha zamonlardagi eng yaxshi futbolchi deb hisoblayman.”