Superliganing 15-turi doirasidagi AGMK - "So‘g‘diyona" uchrashuvi oldidan mazkur o‘yin haqida tayyorlangan prevyuni taqdim etamiz.
O‘zaro o‘yinlar tarixi haqida
— Mazkur jamoalar to‘qnashuvlari tarixiga e’tibor qaratsak, bo‘lajak o‘yin AGMK hamda "So‘g‘diyona" o‘rtasidagi 24-uchrashuvga aylanadi. Qayd etilgan natijalar ko‘rsatkichi jizzaxliklar foydasida. O‘tkazilgan bellashuvlarning 8tasida AGMK g‘alaba qozongan bo‘lsa, "So‘g‘diyona" hisobida 9 g‘alaba mavjud. Qolgan 6 o‘yinda esa durang qayd etilgan. To‘plar nisbati ko‘rsatkichi esa jamoamiz foydasida: 36-32.
Raqib haqida
— "So‘g‘diyona" ayni paytda 14 o‘yindan 16 ochko to‘plagan holda jadvalda 9-o‘rinni egallab turibdi. Baqoyev jamoasi joriy mavsum "Paxtakor", "Lokomotiv", "Buxoro" va "Surxon" jamoalarini mag‘lub etdi. Shuningdek, birinchi davrada AGMK, "Andijon", "Bunyodkor" va "Qizilqum" bilan durang o‘ynadi. Jizzaxliklar birinchi davrada bo‘lgani singari ilk bahsni "Mash’al"ga qarshi o‘tkazib, har ikkalasida mag‘lubiyatga uchrashdi.
AGMKning turnir jadvalidagi holati haqida
— Jamoamiz birinchi davrani mag‘lubiyatsiz o‘tkazib, ikkinchi davrani Bekoboddagi o‘yinda qabul qilingan mag‘lubiyat bilan boshladi. Ayni paytda jamoa hisobida 29 ochko mavjud va musobaqa jadvalida 2-o‘rinni egallab turibmiz.
Tayyorgarlik haqida
— AGMK mazkur o‘yinga jiddiy tayyorgarlik ko‘rmoqda. Boisi, jamoa ikkinchi davra startini muhim 3 ochkoni boy bergan holda boshladi va kelgusi turda bu bo‘shliqni to‘ldirish maqsadida "So‘g‘diyona" bilan o‘yinga g‘alabani ko‘zlagan holda hozirlanmoqda. "Metallurg"ga qarshi o‘yindan keyin jamoa futbolchilari ertasi kunidanoq bo‘lajak bahsga tayyorgarlikni boshlashdi.
Xushtak egasi
— Bo‘lajak bahsni boshqarish iqtidorli referi Asker Najafaliyev gardaniga tushdi. Mazkur tayinlov Asker Najafaliyev uchun AGMK ishtirokidagi beshinchi bahsga aylanadi. Bunga qadar Olmaliqqa o‘tgan mavsum uch marotaba va joriy yil bir marta tashrif buyurgan Najafaliyev jamoamizning “So‘g‘diyona” (0:2), “Nasaf” (2:1) bilan bo‘lgan o‘yin, “Qizilqum”ga (4:1) qarshi uchrashuv va joriy mavsum “Mash’al» bilan bellashuvda ishlagandi.
Mazkur tashrif esa Najafaliyevning Olmaliqdagi beshinchi safariga aylanadi. Hozircha ushbu hakam ishlagan o‘yinlarda AGMK 3 g‘alaba va 1 mag‘lubiyat qayd etgan. Qizig‘i, yagona mag‘lubiyat aynan AGMK - "So‘g‘diyona" o‘rtasidagi o‘tgan yilgi mavsumga to‘g‘ri keladi. Najafaliyev ikkinchi bor ushbu qarama-qarshilikda ishlaydi.
Eslatib o‘tamiz, Superliganing 15-turi doirasidagi "So‘g‘diyona"ga qarshi bahs Olmaliqdagi OKMK sport majmuasida 17 sentyabr kuni soat 19:00da boshlanadi. O‘yin karantin talablariga muvofiq muxlislarsiz o‘tkaziladi.
Superliga, 15-tur.
17 sentyabr, payshanba
AGMK — «So‘g‘diyona» (19:00)
Olmaliq shahri, OKMK sport majmuasi.
Hakamlar: Asker Najafaliyev, Ruslan Serazitdinov, Olim Abduvosilov, Husan Muzaffarov
Nazoratchi: Bobur Haydarov
Komissar: Jahongir Rahmatullayev
