Ushbu ruknimizdagi eng so‘nggi yangiliklar bilan tanishtirishda davom etamiz.
«Valensiya» futbolchisi nishonda
Angliyaning «Manchester Yunayted» jamoasi «Valensiya» yarim himoyachisi Urosh Rachich bilan qiziqib qoldi.
“The Sun” nashrining ma’lum qilishicha, «qizil iblislar» 22 yoshli serb uchun 28 million yevro sarf etishga tayyor.
Manbaning ma’lum qilishicha, ispan klubi ayni damda moliyaviy nochor ahvolda. Shu sababli, o‘z futbolchisini jamoada olib qolmoqchi emas.
«Liverpul» futbolchisi «Sheffild» e’tibor markazida
Angliyaning «Liverpul» klubi hujumchisi Rayan Bryuster faoliyatini «Sheffild Yunayted»da davom ettirishi mumkin.
“The Star” nashrining ma’lum qilishicha, klub 20 yoshli futbolchini bir mavsumga ijaraga olishni reja qilmoqda. Rayanning o‘zi ham ko‘proq o‘yin amaliyotiga ega bo‘lish niyatida. Shu sababli, boshqa klubda o‘zini sinab ko‘rishga qarshi emas.
Manbaning ma’lum qilishicha, «Sheffild» ustozi Kris Uaylder yosh futbolchi uchun asosiy tarkibdan joy berishga tayyor.
Under APLda?!
Rimning «Roma» klubi vingeri Jengiz Under faoliyatini APLda davom ettirishga juda yaqin.
“The Sun” nashrining ma’lum qilishicha, 23 yoshli turk futbolchisi bilan «Lester» klubi jiddiy qiziqib qolgan va transferni amalga oshirish maqsadida 25 million yevro sarf etishga tayyor.
Eslatib o‘tamiz, Under ortda qolgan mavsumda «Roma» safida 18 ta o‘yinda maydonga tushdi va 3 ta gol+3 ta assistni o‘z hisobiga yozdirib qo‘ydi.
Ernandes ketadimi?
Myunhenning «Bavariya» jamoasi tarixidagi eng qimmat futbolchisi – Lyuka Ernandes boshqa klubga ravona bo‘lishi mumkin.
TF1 nashrining ma’lum qilishicha, 24 yoshli fransuz bilan PSJ jiddiy qiziqib qolgan. Ernandes ham jamoada o‘z o‘rnini yo‘qotib qo‘yganidan norozi. Shu sababli, o‘z vataniga qaytib ketishga qarshi emas.
Eslatib o‘tamiz, «Bavariya» Ernandesni qo‘lga kiritish uchun bir mavsum ilgari 80 million yevrodan voz kechgan edi.
