«Lokomotiv» — «Navbahor» (1:0) uchrashuvidan keyingi matbuot anjumanining ikkinchi qismida mezbon jamoa bosh murabbiyi Andrey Miklyayev ishtirok etdi.

– Muhim 3 ochkoni qo‘lga kiritdik, jamoa saviyasi ko‘tarilmoqda, qayta tug‘ilmoqda desak bo‘ladi. Buni Kopadzening kelishi bilan bog‘lay olamiz. Tushunib turibsiz, tarkibda yoshlar juda ko‘p, jamoada avlodlar almashinuvi davri bo‘lmoqda. Bugun xarakter ko‘rsata olganimizdan xursandman, o‘yin bobida o‘sishga erishyapmiz, hisobni ham foydamizga o‘zgartira oldik. Yigitlarga rahmat demoqchiman, ular bugun yaxshi o‘ynashdi, o‘yin oldidan kiyim almashtirish xonasida berilgan ko‘rsatmalarga qattiq rioya qilishdi. «Andijon»ga qarshi o‘yindan keyin ushbu bahsga qattiq tayyorlandik, ko‘rsatmalar ham bajarildi. G‘alaba orqali turnir jadvalida biroz bo‘lsada ko‘tarildik, endi esa tepaga ko‘tarilishda davom etish kerak. Buyog‘iga ko‘proq ochkolar jamg‘arishga harakat qilamiz.

– Jamoa 90 daqiqa mobaynida tinmay pressing qildi. Murabbiylar shtabi futbolchilarning tez charchab qolishidan qo‘rqmadimi?
– Sizga 90 daqiqa tuyuladi, biroq bu juda qiyin. Agar o‘yinni diqqatlik bilan ko‘rgan bo‘lsangiz, dastlabki 15-20 daqiqa mobaynida raqiblarga qarshi jiddiy bosim uyushtirish vazifasini qo‘ygandik. Buncha vaqt pressing qilishga bugun zaxiramiz ham torlik qilardi. Bugun turli sabablarga ko‘ra 6 futbolchimiz o‘ynamadi. Bunga qadar zaxiramiz ham bunchalik tor bo‘lmagandi, shu boisdan yoshlarga imkon berdik. Qancha pressing qilish kerak bo‘lsa, shuncha ishladik. Kopadze juda quvvatchan inson, futbolchilarni oldinga undab, oxirigacha boshqarib turdi, raqiblar to‘p bilan bo‘lib turgan paytida o‘ylashga vaqt bermadik. Asosiysi, raqib yarim maydonida ham pressing qila oldik.

– «Navbahor» «Lokomotiv» uchun noqulay raqib hisoblanadi. Klubning moliyaviy holati yaxshilanganidan keyin jamoa yutishni boshladi.
– Klubning moliyaviy holati yaxshilanganini qayerdan bildingiz? Bu haqida hatto men hech nima bilmayman. Bizda moliyaviy holat doimo yaxshi bo‘lgan. Muammo bo‘lmagan, muammo bu pandemiya. Karantin davrida kimlardir mashg‘ulot qildi, kimlardir qilmadi. Toshkentda ko‘p muammo bo‘ldi, shahar yopilganida qiynaldik, ko‘chaga chiqa olmadik. Bu muammo. Klubda esa moliyaviy tomonlama muammo bo‘lmadi.

– Dilshod Komilovning o‘yiniga qanday baho berasiz?
– Yosh, iqtidorli futbolchi. Yoshlar tarkibimizdan asosiy jamoaga jalb qildik va imkon beryapmiz. Zoteev, Hoshimov ketganidan keyin ular o‘ynaydigan joylar bo‘shab qoldi, ahamiyat bergan bo‘lsangiz, ularning o‘rniga boshqa futbolchilar olib kelmadik. Yoshlar o‘yindan o‘yinga kuchaymoqda, jamoaga moslashmoqda. Bugun esa jamoadagi barchaga rahmat aytaman.

– Rahbariyat jamoa oldiga qanday vazifa qo‘ygan?
– Ikki o‘yinni yutganimizdan keyin endi har bir o‘yinda maksimal ravishda harakat qilishda davom etamiz. Kapadze uchun ham men uchun ham klubning taqdiri muhim. Tarkibda ko‘plab yulduz futbolchilar bor. Jamoa bunday holatda bo‘lib qolmasligi kerak. O‘yin bobida ham, hisob bobida ham oldinga harakatlanishimiz kerak. Bugungi o‘yinda ham to‘p bir joyda turib qolmadi. Chiroyli o‘yin ko‘rdik. Barchaga rahmat aytaman.