“Navbahor”ga qarshi o‘yindan keyin “Lokomotiv”ga g‘alaba keltirgan gol muallifi Avazbek O‘lmasaliyev fikrlari bilan o‘rtoqlashdi.

– Avaz, avvalo gol urilgan vaziyat haqida gapirsangiz.

– Avvalo, aytishim mumkinki, juda tez hujumga o‘tdik. Temurxo‘ja Abduxoliqov to‘p bilan edi, yaxshi nuqtaga ochildim va to‘pni so‘radim. Bir raqibdan o‘tgandan keyin o‘ylab ham o‘tirmasdan zarba yoʻlladim. Miyamda faqatgina gol haqida o‘ylar bor edi.

– Jamoaning Superligadagi vazifasi borasida nima deya olasiz? Yangilarning jamoaga moslashuvi qanday kechmoqda?

– g‘alaba uchun maydonga tushyapmiz. Yangilar jamoaga tezda moslashib ketganini barcha ko‘rib turibdi, ular yaxshi o‘yin ko‘rsatmoqda. Kollektiv haqida ham shunday iliq fikrlarni ayta olaman, navbatdagi o‘yinlarga ham shunday pozitiv kayfiyatda tayyorlanamiz. Asosiy maqsad — istalgan imkoniyatdan foydalanib, g‘alabaga erishish.

– Jamoadoshlaringiz gol bilan qay tariqa tabrikladi?

– Ha, barchadan tabrik qabul qilib oldim. Yo‘ldan uchragan barcha yelkamni urdi (kuladi). Umuman olganda, barchasi ajoyib! Shunday ruxda davom etishga harakat qilamiz. Shuni aytishim kerak, golimni akamga bag‘ishlayman. U televizor orqali o‘yinni tomosha qilib turdi. Akamni xursand qilganimdan juda ham xursandman.