Coca Cola Superliga klublari bir yil avvalgidan kuchliroqdek tasavvur uyg‘otmoqda. Boisi, 9 klub murabbiylari o‘tgan mavsumda ham shu jamoada faoliyat olib bordi. Ular o‘z klubiga ancha ko‘nikdi deyish mumkin.
Turnir jadvalida "Paxtakor" kuchliroq. Chempionlar ligasidagi ikki o‘yinida ham klub ancha shakllangani ko‘rindi. Ammo keyingi 5 ta jamoa o‘rtasidagi raqobatga e’tibor qiling. Ular bir-biriga juda yaqin, raqobat kuchli.
O‘rtada yana 4 talik raqobat bor, shuningdek, quyi 4 klub o‘rtasida ham yaxshigina raqobat yuzaga kelgan. Bu chempionat qiziqarli o‘tayotganidan dalolat beradi. Umuman, 2020 yil sarguzashtlarga boy bo‘lmoqda, deyish mumkin.
Endi esa kelasi tur anonsiga qarang. Hamma uchrashuvda fayz bo‘lishi shubhasiz.
"Buxoro" o‘ziga keldi. AGMK va "Qo‘qon-1912" bilan o‘yinlarni eslang. "Loko" Kapadze bilan yuz foizlik natija qayd etmoqda. Uchrashuv Toshkentda o‘tmaydi, ancha qiziq bo‘ladi.
"Navbahor" — "Andijon". Birinchi o‘yinda murosa bo‘lgandi. "Navbahor" o‘z uyida dahshat, "Andijon"ga ochko suv va havodek. Zo‘r o‘yin bo‘ladi.
"So‘g‘diyona" — "Qo‘qon-1912". Baqoyevning endi ochko yo‘qotishga haqi yo‘q, xalqaro maydon uzoqlashyapti. Birinchi o‘yindagi alamli mag‘lubiyat uchun intiqom kerak. Yaxshi o‘yin bo‘ladi.
"Nasaf" — "Surxon". Qashqadaryo va Surxondaryo to‘qnash kelganida kimningdir ustunroq ekani yo‘qqa chiqadi. Bu mintaqa derbisi, ajoyib o‘tadi.
"Bunyodkor" — AGMK. Abramov — Qosimov. 29 va 30 ochko. Boshqa izoh shart emas.
Diyor Imomxo‘jayev.
