Coca Cola Суперлига клублари бир йил аввалгидан кучлироқдек тасаввур уйғотмоқда. Боиси, 9 клуб мураббийлари ўтган мавсумда ҳам шу жамоада фаолият олиб борди. Улар ўз клубига анча кўникди дейиш мумкин.

Турнир жадвалида "Пахтакор" кучлироқ. Чемпионлар лигасидаги икки ўйинида ҳам клуб анча шакллангани кўринди. Аммо кейинги 5 та жамоа ўртасидаги рақобатга эътибор қилинг. Улар бир-бирига жуда яқин, рақобат кучли.

Ўртада яна 4 талик рақобат бор, шунингдек, қуйи 4 клуб ўртасида ҳам яхшигина рақобат юзага келган. Бу чемпионат қизиқарли ўтаётганидан далолат беради. Умуман, 2020 йил саргузаштларга бой бўлмоқда, дейиш мумкин.

Энди эса келаси тур анонсига қаранг. Ҳамма учрашувда файз бўлиши шубҳасиз.

"Бухоро" ўзига келди. АГМК ва "Қўқон-1912" билан ўйинларни эсланг. "Локо" Кападзе билан юз фоизлик натижа қайд этмоқда. Учрашув Тошкентда ўтмайди, анча қизиқ бўлади.

"Навбаҳор" — "Андижон". Биринчи ўйинда муроса бўлганди. "Навбаҳор" ўз уйида даҳшат, "Андижон"га очко сув ва ҳаводек. Зўр ўйин бўлади.

"Сўғдиёна" — "Қўқон-1912". Бақоевнинг энди очко йўқотишга ҳақи йўқ, халқаро майдон узоқлашяпти. Биринчи ўйиндаги аламли мағлубият учун интиқом керак. Яхши ўйин бўлади.

"Насаф" — "Сурхон". Қашқадарё ва Сурхондарё тўқнаш келганида кимнингдир устунроқ экани йўққа чиқади. Бу минтақа дербиси, ажойиб ўтади.

"Бунёдкор" — АГМК. Абрамов — Қосимов. 29 ва 30 очко. Бошқа изоҳ шарт эмас.

Диёр Имомхўжаев.