"Liverpul" "Vulverxempton" forvardi Diogo Jota bilan shartnoma shartlarini kelishib oldi. Goal xabariga ko‘ra, tomonlar 5 yillik shartnoma borasida kelishuvga erishgan.
23 yoshli portugaliyalik futbolchi uchun "qizillar" qariyb 49 million yevro miqdorida pul to‘laydi, shundan 45 millioni bitimning kafolatlangan qismi, qolgani esa potensial bonuslardir. "Bo‘rilar" moslashuvchan to‘lov shartlariga rozi bo‘lishdi, shuning uchun yaqin 12 oy ichida ularning hisob raqamiga ushbu summaning atigi 10 foizi kiritiladi. Bitimning bir qismi himoyachi Ki-YAni Xuverning "Liverpul"dan "Vulverxempton"ga o‘tishini o‘z ichiga oladi.
Jota "Vulverxempton"ga 2017 yil yozida "Atletiko"dan ijara asosida o‘tgandi va bir yildan so‘ng "bo‘rilar" uning shartnomasini 14 million yevroga sotib olishgandi. O‘shandan beri hujumchi ingliz klubi safida 131 uchrashuv o‘tkazgan va 44 gol urgan.
Bu mersisaydliklarning ushbu haftadagi ikkinchi yirik transferi. 18 sentyabr kuni "qizillar" yarim himoyachi Tyago Alkantara jamoasiga o‘tganligini e’lon qilishdi.