Superliganing 16-turi doirasida AGMK Toshkentning "Bunyodkor" jamoasi bilan to‘qnashadi.
Bo‘lajak o‘yin ushbu jamoalarning o‘zpro barcha musobaqalardagi umumiy hisobda 33-uchrashuviga aylanadi. AGMK va "Bunyodkor" qarama-qarshiligi tarixiga nazar soladigan bo‘lsak, o‘tkazilgan o‘yinlarda 7 marotaba jamoamiz g‘alabani tantana qilgan, 6 bor durang qayd etilgan va 19 marta "Bunyodkor" g‘alaba qozongan. To‘plar nisbati ham "qaldirg‘ochlar" foydasig‘a: 61-35.
AGMKni Mirjalol Qosimov, "Bunyodkor"ni esa Vadim Abramov boshqarayotgandan buyon ushbu jamoalar uchun bo‘lajak o‘yin hisob bo‘yicha oltinchi bahsga aylanadi. O‘tgan yili har uchala frontda duch kelgan AGMK va "Bunyodkor" bellashuvlarida chempionat doirasida "Bunyodkor" Olmaliqda g‘alaba qozongan bo‘lsa, Toshkentdagi o‘yinda AGMK "qaldirg‘ochlar"ga imkoniyat qoldirmay mag‘lub etgandi. Shuningdek, Liga Kubogi va O‘zbekiston Kubogi doirasidagi uchrashuvlarda AGMK yaqqol ustunlik bilan g‘alabani tantana qilgandi. Joriy mavsum esa birinchi davrada jamoamiz “qaldirg‘ochlar”ni ishonchli tarzda mag‘lub etishgandi.
Ayni paytda jamoalar turnir jadvalida yonma-yon joylashishgan. AGMK 30 ochko bilan 2-o‘rinni egallab turgan bo‘lsa, "Bunyodkor" 29 ochko to‘plagan holda "Nasaf" bilan 3-o‘rinni bo‘lishib turibdi.
Ma’lumot o‘rnida: AGMK O‘zbekiston milliy chempionatlari tarixidagi 355-uchrashuvi ostonasida turibdi. Jamoa elitada o‘tkazilgan 354 o‘yindan 127tasi g‘alaba qozongan, 151 mag‘lubiyat va 76 bellashuvda durang qayd etilgan. To‘plar nisbati: 488-514.
"Bunyodkor" joriy mavsum faqatgina ikki bor mag‘lubiyatga uchragan. Mavsumdagi ilk mag‘lubiyatni aynan jamoamizdan qabul qilgan "qaldirg‘ochlar" ikkinchi bor mamlakat chempioni "Paxtakor"ga imkoniyatni boy berishgandi.
Uchrashuvni iqtidorli hakam Jasur Muxtorov boshqarib boradi. Bu Muxtorovning jamoamiz ishtirokidagi 7-o‘yiniga aylanadi. Mazkur hakam boshqargan bahslarda AGMK 4 g‘alaba, 1 durang va 1 mag‘lubiyat qayd etgan.
Superliga, 16-tur.
22 sentyabr, seshanba
«Bunyodkor» — AGMK
“Bunyodkor” stadioni.
Boshlanish vaqti: 18:00
