Angliyaning «Manchester Yunayted» jamoasi futbolchisi Xuan Mata «qizil iblislar»ning APLni mag‘lubiyat bilan boshlaganiga izoh berib o‘tdi. "Sky Sport" nashri uchun intervyu bergan futbolchi nima uchun jamoaviy o‘yinda muammolar bor ekanligi haqida to‘xtalib o‘tdi.

"Bilasizmi, jamoamiz APL startini kutilmagan natija bilan boshladi. Bu tashqaridan juda g‘alati ko‘rinishi mumkin, ammo bu bejiz emas.

Jamoamizning jismoniy holati ajoyib holatda. Yangi mavsumdagi uchrashuvlarda jismoniy tayyorgarlik borasida hech qanday gap-so‘z bo‘lishi mumkin emas. Yigitlar har haftada 90 daqiqa katta kuch bilan to‘p surishga qodir.

Murabbiylar shtabining uchrashuvga tanlagan taktikasini ham xato edi deb bo‘lmaydi.

Gap shundaki, klub futbolchilari uzoq muddat birga to‘p surgani yo‘q. Aynan shu omil sababli «Manchester Yunayted»ning ilk uchrashuvdagi o‘yini yorqin o‘tmadi. Bundan tashqari, ruhiy holatni ham alohida qayd etib o‘tmoqchiman. Agar futbolchi maydonda 90 daqiqa harakat qilsa va natijaga erisha olmasa, bu unda kichik depressiyaning paydo bo‘lishiga sabab bo‘ladi.

Bu vaziyatdan chiqib ketish uchun tezroq g‘alabalar seriyasini boshlab olish lozim. Birin-ketin g‘alabalar insonning o‘ziga bo‘lgan ishonchini ortga qaytaradi. Agar siz maydonga tushgan o‘yiningizda yaxshi to‘p sursangiz, keyingi o‘yinda tanangizni yanada yaxshiroq his etasiz.

Biz anchadan beri birga mashq qilmaganimiz sababli o‘yin ritmini biroz unutib qo‘ydik. Endi tezroq g‘alaba qozonishimiz lozim. Ana shunda o‘zimizga bo‘lgan ishonchimizni ortga qaytarib olishimiz mumkin."