«Manchester Yunayted» bosh murabbiyi Ule-Gunnar Sulsher APLning 3-turi doirasida bo‘lib o‘tgan «Brayton»ga qarshi o‘yindan (3:2) keyin «Tottenxem» ustozi Joze Mourinyoning ustidan kuldi.

Eslatib o‘tamiz, portugaliyalik mutaxassis Yevropa ligasi 3-saralash bosqichidan o‘rin olgan «Shkendiya 79»ga qarshi o‘yinda darvozaning balandligini o‘lchagan va uning me’yordan 5 sm. past ekanligini aniqlab, uni almashtirishlarini so‘ragan edi.

«Brayton» futbolchilari esa «MYU»ga qarshi o‘yinda 5 marta darvoza to‘sin va ustunlarini nishonga olishgan edi. "Qizil iblislar" g‘alaba to‘pini 90+10-daqiqada penaltidan kiritishdi.

«Baxtimizga, bu yerda Mourinyo yo‘q. Aks holda u darvoza ustun va to‘sinlarini almashtirgan bo‘lardi. Bunday holatda esa bir ochkodan ko‘pini qo‘lga kirita olmasdik», — dedi Sulsher "Goal"ga bergan intervyusida.

Mourinyo «Nyukasl»ga qarshi bo‘lib o‘tgan APL bahsidan (1:1) so‘ng norvegiyalik hamkasbiga javob qaytardi.

«O‘ylashimcha, Sulsher uchun darvoza o‘lchamlari muhim ahamiyatga ega emas, unga jarima maydoni o‘lchami muhim. U jarima maydoni o‘lchami bir metrga qisqa bo‘lgan maydonda futbol o‘ynashga hech qachon rozi bo‘lmagan bo‘lardi. Aksincha, uning uchun jarima maydoni bir necha metrga katta bo‘lgani yaxshi», — dedi Mourinyo.