«Jenoa» klubi «Rostov» hujumchisi Eldor Shomurodovni qo‘lga kiritish uchun dastlabki taklifini oshirishga majbur bo‘ldi.

Umumiy transfer 7,5 million yevroga teng bo‘ldi. Italiyaliklar ushbu summani 3ga bo‘lgan holda o‘tkazib berishadi. "Jenoa" dastlab 3,5 million yevro o‘tkazib bersa, keyinchalik klub 2 million yevrodan to‘lovni amalga oshiradi.

Bundan tashqari, Shomurodov keyinchalik boshqa jamoaga sotilsa, «Rostov» transfer summasining 15 foiziga egalik qiladi.

Eldor bugun, 2 oktyabr kuni tibbiy ko‘rikdan o‘tadi va shundan so‘ng «Jenoa» bilan 4 yillik shartnoma imzolaydi. Uning bir yillik maoshi 600-700 ming yevroga teng bo‘ladi.

Shomurodovning «Jenoa»ga o‘tishi hal bo‘lishidan bir kun avval A seriyaning boshqa klublari «Fiorentina» va «Verona» o‘zbekistonlik futbolchini sotib olishga tayyor ekanini ma’lum qilishgan. Oqibatda «Jenoa» o‘z taklifini oshirdi va transferni amalga oshirdi.

Shomurodov o‘z agenti German Tkachenko bilan Genuya shahriga yetib keldi. Hozirda u aeroport yaqinidagi mehmonxonaga joylashdi. Eldor qachon «Jenoa»ning mashg‘ulotiga qo‘shilishi ma’lum emas. Boisi, hozirda butun jamoa karantinga joylashtirilgan. Jamoaning 11 nafar futbolchisida koronavirus aniqlandi.

Italiya A seriyasining 3-turidan o‘rin olgan «Jenoa» — «Torino» uchrashuv noma’lum muddatga qoldirildi. Genuyaliklar 1-turda «Krotone» ustidan yirik hisobda (4:1) ustun kelib, 2-turda «Napoli»ga yirik hisobda (0:6) mag‘lub bo‘ldi.