Ko‘plab futbol muxlislarining istak va murojaatlarini inobatga olib, “COVID-19 pandemiyasi davrida mashg‘ulotlar, musobaqalar hamda o‘quv-mashg‘ulot yig‘inlarini tashkil etish to‘g‘risida”gi tartib asosida O‘zbekiston Superliga, Pro-liga hamda Birinchi ligasida qatnashayotgan barcha futbol klublari ishtirokidagi uchrashuvlarga 1000 (bir ming) nafar futbol muxlislari kiritilishiga ruxsat berildi.

Coca Cola Superliga 19-turidan o‘rin olgan bahsda "Navbahor" o‘z maydonida Bekobodning “Metallurg” jamoasini qabul qiladi.

Mazkur o‘yinda “Navbahor”ning fidoyi hamda ashaddiy muxlislari endi sevimli jamoalarini bevosita stadionda qo‘llab-quvvatlash imkoniyatiga ega bo‘lishdi.

“Navbahor” – “Metallurg” jamoalari o‘rtasidagi uchrashuv uchun 1000 (bir ming) dona chipta chiqarildi va ushbu chiptalarni ertaga soat 9:00 dan boshlab, “Navbahor” uy uchrashuvlarini o‘tkazadigan “Markaziy” o‘yingoh kassalarida sotish boshlanadi.

Chipta narxi — 30 ming so‘m.

“Lochinlar”ning o‘yinini bevosita stadionda jonli tarzda tomosha qilishni sog‘ingan muxlislar, shoshiling!

Eslatib o‘tamiz, “Navbahor” – “Metallurg” o‘yiniga faqat chipta sotib olgan muxlislargina kiritiladi. Chiptasiz muxlislar stadionga qo‘yilmaydi va bu qattiq nazorat ostiga olinadi.

“Navbahor” – “Metallurg” jamoalari o‘rtasidagi o‘yin 19 oktyabr kuni soat 18:00 da start oladi.

“Navbahor” PFK matbuot xizmati.