Superliga 19-turidan o‘rin olgan «Buxoro» — «Nasaf» (0:0) uchrashuvidan so‘ng matbuot anjumanining birinchi qismida jamoamiz bosh murabbiyi Ro‘ziqul Berdiyev bugungi bellashuv haqida o‘z fikrlarini bildirib o‘tdi.

“Odatda «Buxoro» jamoasi himoyaviy o‘yin ko‘rsatardi, bugun yana ham himoyaviy o‘yin ko‘rsatishdi. Ularning rejasini buzish uchun birinchi bo‘limdagi vaziyatlardan gol ura olishimiz lozim edi. O‘shanda hujumda yaqqol ustunlikka ega bo‘lishimiz mumkin edi. Afsuski «Buxoro» jamoasi ikkinchi bo‘limda ko‘pchilik bo‘lib himoyalandi va bizga vaziyat yaratishga ko‘p ham imkon bermadi. O‘ylaymanki, bugungi durang ikki jamoani ham qoniqtirmaydi, chunki bizga ham, ularga ham g‘alaba kerak edi. Albatda bugungi o‘yinda g‘alaba qozonishni maqsad qilgan edik, ammo bunday bo‘lmadi. Menimcha bunga jamoamizning bugungi ko‘rsatgan oyini ham sabab bo‘ldi. Vaziyatlardan unumli foydalanishda hujumchilarimizga sovuqqonlik yetishmadi”, – deydi Ro‘ziqul Berdiyev.

— Bugungi uchrashuvga hakamlar o‘z ta’sirini ko‘rsatishdimi?
— Hakamlar haqida oldin hech gapirmasdim. Lekin bugungi hakam saviyasi va darajasi menga pastdek ko‘rindi. Chunki uning maydondagi harakati ham, chiqarayotgan qarori ham bizga tushunarsiz bo‘ldi. Bunga nima sabab bo‘lganligini bilish qiyin. Yakkakurashlardagi vaziyatlarda ko‘p xato qildi, ba’zi vaziyatlarda g‘alati-g‘alati qarorlarni chiqardi. Yakka kurashlardagi follarda asosan «Buxoro» foydasiga ko‘proq qarorlar qabul qildi. Hakamlardan bu darajadagi hakamlikni kutmagandik.