Суперлига 19-туридан ўрин олган «Бухоро» — «Насаф» (0:0) учрашувидан сўнг матбуот анжуманининг биринчи қисмида жамоамиз бош мураббийи Рўзиқул Бердиев бугунги беллашув ҳақида ўз фикрларини билдириб ўтди.

“Одатда «Бухоро» жамоаси ҳимоявий ўйин кўрсатарди, бугун яна ҳам ҳимоявий ўйин кўрсатишди. Уларнинг режасини бузиш учун биринчи бўлимдаги вазиятлардан гол ура олишимиз лозим эди. Ўшанда ҳужумда яққол устунликка эга бўлишимиз мумкин эди. Афсуски «Бухоро» жамоаси иккинчи бўлимда кўпчилик бўлиб ҳимояланди ва бизга вазият яратишга кўп ҳам имкон бермади. Ўйлайманки, бугунги дуранг икки жамоани ҳам қониқтирмайди, чунки бизга ҳам, уларга ҳам ғалаба керак эди. Албатда бугунги ўйинда ғалаба қозонишни мақсад қилган эдик, аммо бундай бўлмади. Менимча бунга жамоамизнинг бугунги кўрсатган ойини ҳам сабаб бўлди. Вазиятлардан унумли фойдаланишда ҳужумчиларимизга совуққонлик етишмади”, – дейди Рўзиқул Бердиев.

— Бугунги учрашувга ҳакамлар ўз таъсирини кўрсатишдими?
— Ҳакамлар ҳақида олдин ҳеч гапирмасдим. Лекин бугунги ҳакам савияси ва даражаси менга пастдек кўринди. Чунки унинг майдондаги ҳаракати ҳам, чиқараётган қарори ҳам бизга тушунарсиз бўлди. Бунга нима сабаб бўлганлигини билиш қийин. Яккакурашлардаги вазиятларда кўп хато қилди, баъзи вазиятларда ғалати-ғалати қарорларни чиқарди. Якка курашлардаги фолларда асосан «Бухоро» фойдасига кўпроқ қарорлар қабул қилди. Ҳакамлардан бу даражадаги ҳакамликни кутмагандик.