Legioner futbolchi va murabbiylar bilan ishlashda juda ehtiyotkor bo‘lish, barcha ishni qonunan amalga oshirishgina ishning silliq kechishiga sabab bo‘ladi.

Oltin qoida shundan iboratki, har qanday pul o‘sha legioner hisob-raqamida ko‘rinishi shart. Bank bu borada aniq ma’lumot taqdim eta oladi. Futbolchini naqd pul ko‘rinishida rag‘batlantirish esa faqat va faqat muammo keltirib chiqaradi. Shuningdek, shubhalarni ko‘paytiradi. Birinchidan, soliqdan qochishga harakatdek ko‘rinadi. Ikkinchidan, naqd pul berayotgan tarafga bo‘lgan shubhani oshiradi. Uchinchidan, naqd pulni uchinchi qo‘lga ulashish doim oson bo‘lgan.

Shuningdek, legionerlar uchun pulning o‘z vaqtida uning hisobiga o‘tishi ham juda muhim. Sababi, ikki oy daromadini olmagan futbolchi o‘z klubini ogohlantirib, keyinroq shartnomani bir taraflama bekor qilishi mumkin. Kechikib o‘tkazilgan pul (futbolchi O‘zbekistonni tark etsa) milliy valyuta ko‘rinishida bo‘lsa, talabgor uni hech qachon tan olmaydi. Keyin bank ham o‘sha pulni o‘z egasi roziligisiz klubga qaytarib bermaydi.

Biz maksimal darajada naqd pul aylanishini kamaytirishga erishishimiz kerak. Bu futboldagi qator ishlarni tekislashi mumkin. Va ayniqsa, “oldi-berdi"ni sezilarli ravishda kamaytiradi.

Diyor Imomxo‘jayev.