Coca Cola Superliga 20-turi doirasidan o‘rin olgan bahsda “Navbahor” Jizzaxda “So‘g‘diyona” mehmoni bo‘ladi.

Mazkur jamoalar O‘zbekiston chempionatlarining Cuperliga (oliy liga)sida o‘zaro 49 marta uchrashishgan. Ushbu o‘yinlarning 25 tasida “Navbahor” g‘alaba qozongan bo‘lsa, “So‘g‘diyona” 17 ta bahsda zafar quchgan, 7ta o‘yinda durang qayd etilgan. To‘plar nisbatidagi ko‘rsatkich 88-57, “Navbahor”foydasiga.

Namanganliklar o‘zaro o‘yinlarda 82 ochkoni qo‘lga kiritishgan bo‘lsa, jizzaxliklar hisobida 58 ochko mavjud.

“So‘g‘diyona” – “Navbahor” klublari o‘rtasidagi o‘zaro uchrashuvlardagi eng yirik hisob 1996 yili qayd etilgan. O‘shanda futbolchilarimiz Namanganda jizzaxliklar darvozasiga 7ta javobsiz to‘p kiritishgandi.

Sermahsullik borasida esa 2000 va 2014 yillardagi uchrashuvlar tarixda qolgan. E’tiborlisi, o‘sha o‘yinlarda darvozalarga to‘qqiztadan gol urilgan. 2000 yili Namanganda bo‘lib o‘tgan uchrashuvda mezbonlar 6:3 hisobida zafar quchishgan bo‘lsa, 2014 yili Jizzaxda o‘tkazilgan bahsda “So‘g‘diyona” 5:4 hisobida g‘alaba qozongandi.

Jizzaxda shu paytgacha bo‘lib o‘tgan bahslarda mezbonlar 17ta o‘yinda g‘alaba qozonib, 3ta uchrashuvda durangga imzo chekishgan hamda 4ta bahsda mag‘lubiyatga uchrashgan.

O‘tgan mavsumda Jizzaxda bo‘lib o‘tgan bahsda 0:0 hisobi qayd etilgandi.

Ushbu jamoalarning Namanganda bo‘lib o‘tgan birinchi davradagi uchrashuvida “lochinlar” Ruslan Bolov hamda Ivan Solovyovning gollari evaziga 2:0 hisobida zafar quchishgandi.

“Navbahor” PFK matbuot xizmati.