Pro liga 14-turi doirasidagi «Dinamo» — «Sho‘rtan» (0:0) uchrashuvidan keyin dastlab mezbonlar bosh murabbiyi Sergey Lushchan o‘yin borasida to‘xtaldi.

— Sergey Ivanovich, «Dinamo» bugun bir ochko qo‘lga kiritdimi yoki 2 ochko yo‘qotdimi?
— Bugungi o‘yinimiz bilan bir ochkoni qo‘lga kiritdik, deb o‘ylayman. Ilk daqiqalardagi jarohat ta’sirimi bilmadim, o‘yinimiz negadir umuman o‘xshamadi. Ehtimol, raqib jamoa bizni yaxshi o‘rgangandir. Ayniqsa, «Sho‘rtan» 5 himoyachi bilan o‘ynab, qanotlarni yopib qo‘yganidan keyin hujumdagi ishlarimiz yurishmadi. O‘yin davomida ham hujumda yaxshi o‘ynay olmadik. Himoya o‘z ishini qildi, ammo hujumkorlikda qo‘limizdan deyarli hech narsa kelmadi. Bir ochko oldik, endi ertaga «Istiqlol» «Oqtepa»ga qarshi qanday o‘ynashini kutamiz.

— To‘plar nisbatiga ko‘ra «Dinamo»da farq katta...
— Meni hech narsa ajablantirmaydi. Ertangi «Oqtepa» — «Istiqlol» o‘yinida 7-8ta golli farqimiz yo‘qotilmasligiga umid qilaman. Ertaga «Oqtepa»ga muxlislik qilamiz.

— Jahongir Ahmadovning ilk daqiqadayoq jarohat olib, maydonni tark etgani o‘yinga qay daraja ta’sir qildi?
— Jiddiy ta’sir qildi. Birinchi daqiqadayoq yetakchi futbolchilarimizdan birini yo‘qotdik. Har bir jamoa raqibdan kelib chiqib o‘ynaydi. Bugun raqibimiz bizga o‘ynash imkonini bermadi. Shunga qaramay, vaziyatlar bo‘ldi, ammo yarimta imkoniyatdan ham gol urish uchun mahorat yetarlicha bo‘lishi kerak. Takrorlayman, hammasi ertaga Toshkentda bo‘ladigan «Oqtepa» — «Istiqlol» o‘yiniga bog‘liq. Shunga qaramay, keyingi bosqichda to‘p surish umidi bilan o‘z rejalarimizga egamiz.

Ma’lumot uchun, 4-o‘rindagi «Dinamo» 22 ochko bilan 5-o‘rindagi «Istiqlol»dan 3 ochko va gollar nisbatiga ko‘ra 6ta gol oldinda. «Istiqlol» 5-o‘rindagi «Oqtepa»ni safarda 7ta gol farqi bilan yuta olmasa, «Dinamo» to‘rtlikda qolib, Pro liga yakuniy bosqichiga yo‘llanma olib, Superliga uchun kurashishda davom etadi.

Usmon Ibodov yozib oldi.