"Istiqlol" markaziy stadionida Pro liganing 14-tur bahsida Farg‘ona derbisi bo‘lib o‘tdi. Unda "Neftchi" hamda "Turon" klublari kurash olib bordilar.

O‘yin boshlanishiga hech qancha vaqt o‘tmasdan, muxlislar tezkor golga guvoh bo‘lishdi.YAypanliklar jarima maydonimiz tashqarisida to‘pni tepadan oshirib berishganida,to‘pni mehmonlar futbolchisi Sunnatillo Ermatov chiroyli tarzda darvozamiz tomon yo‘llab, hisobni ochishga erishdi — 0:1. Ko‘p hollarda tezkor gol raqib jamoaga salbiy ta’sir ko‘rsatishi tabiiy hol. Bundan neftchilar ham istisno bo‘lishmadi shekilli, ularning birinchi bo‘lim oxirigacha uyushtirgan barcha hujumlari samarasiz yakunlandi.

Ikkinchi bo‘limda jamoamiz murabbiylar shtabi bir qator o‘zgartirishlarni amalga oshirishdi va maydonga tajribali futbolchilarimizdan Mansurjon Saidov, Islombek Karimov va Eldor Ergashev kirib kelishdi. Aytib o‘tish joizki,o‘yin surati ancha jonlanib,jamoamiz bir nechta xavfli hujumlarni yuzaga keltirdi. Ammo, yakuniy zarbalarga kelganda noaniqliklar taqib qilishda davom etdi va bir-ikkita vaziyatda omad ham yuz o‘girganini aytib o‘tish mumkin. Uchrashuv oxirlab borayotganda esa anchadan beri maydonda ko‘rinmagan iqtidorli futbolchimiz Sanjarbek Zokirov zaxiradan maydonga tushirildi. Bu paytga kelib bosh hakam o‘yinning asosiy qismiga 3 daqiqa vaqt qo‘shib berdi. Buni qarangki,aynan 3-4 daqiqa maydonda harakat qilgan Sanjarbek chiroyli uyushtirilgan kombinasiyani gol bilan nishonlab, o‘yindagi muvozanatni tiklashga erishdi — 1:1.

Keskin va shiddatli kurashlarga boy o‘tgan bahsda jangovar durang qayd etildi.

Pro liga, 14-tur
"Neftchi" - "Turon" - 1:1 (0:1)