So‘nggi yillarda O‘zbekiston futbol assosiasiyasi hamda O‘zbekiston professional futbol ligasi yurtimizda futbolni yangi bosqichga olib chiqish yo‘lida katta hajmdagi ishlarni amalga oshirmoqdalar. O‘zbek futbolini baland cho‘qqiga yetaklashda yuqori tashkilotlarimiz bilan yelmaka-elka ishlashda davom etayotgan «Bunyodkor» ko‘plab yangi loyihalarni hayotga tatbiq etmoqda. Xususan, so‘nggi ikki yil davomida Respublikamizning turli hududlarida «Bunyodkor» futbol akademiyasi filiallarini tashkil etilmoqda. Jumladan, bugungi kunda Qo‘qon va Buxoro shaharlarida o‘z filialimizga egamiz.
O‘z geografiyasini kengaytirishda davom etayotgan jamoamiz bu borada yana bir qadam tashladi. Qo‘qon va Buxorodan keyin Toshkent viloyatida ham «Bunyodkor» akademiyasi filiali o‘z faoliyatini boshladi. Endi Toshkent viloyatining Quyi Chirchiq tumani Do‘stobod qo‘rg‘onida hududida istiqomat qiluvchi bolalar millionlar o‘yiniga ilk qadamlarni «Bunyodkor» akademiyasining filiali orqali qo‘yishlari mumkin. Mazkur filialimizda bolalarni futbol bilan shug‘ullanishlari uchun barcha sharoitlar muhayyo qilingan. Shaxsan tuman hokimi Akmal Arslonovich Xolmurodovning tashabbusi va ko‘magi bilan tuman markazidagi stadion hamda unga yondosh sport binolari «Bunyodkor» akademiyasi filiali ixtiyoriga topshirildi. Qisqa vaqt ichida filialimiz qoshida «Bunyodkor-Do‘stobod» jamoasi tuzilib, klub Toshkent viloyati chempionati, 2-liga bahslaridagi ishtirokini boshladi. Shu tariqa mahalliy bolalar katta futbolga ilk qadamlarni filialimizda qo‘yishlari, «Bunyodkor-Do‘stobod» orqali professionalga kirib borish imkoniyatiga ega bo‘lishdi.
