Сўнгги йилларда Ўзбекистон футбол ассоциацияси ҳамда Ўзбекистон профессионал футбол лигаси юртимизда футболни янги босқичга олиб чиқиш йўлида катта ҳажмдаги ишларни амалга оширмоқдалар. Ўзбек футболини баланд чўққига етаклашда юқори ташкилотларимиз билан елмака-елка ишлашда давом этаётган «Бунёдкор» кўплаб янги лойиҳаларни ҳаётга татбиқ этмоқда. Хусусан, сўнгги икки йил давомида Республикамизнинг турли ҳудудларида «Бунёдкор» футбол академияси филиалларини ташкил этилмоқда. Жумладан, бугунги кунда Қўқон ва Бухоро шаҳарларида ўз филиалимизга эгамиз. 

Ўз географиясини кенгайтиришда давом этаётган жамоамиз бу борада яна бир қадам ташлади. Қўқон ва Бухородан кейин Тошкент вилоятида ҳам «Бунёдкор» академияси филиали ўз фаолиятини бошлади. Энди Тошкент вилоятининг Қуйи Чирчиқ тумани Дўстобод қўрғонида ҳудудида истиқомат қилувчи болалар миллионлар ўйинига илк қадамларни «Бунёдкор» академиясининг филиали орқали қўйишлари мумкин. Мазкур филиалимизда болаларни футбол билан шуғулланишлари учун барча шароитлар муҳайё қилинган. Шахсан туман ҳокими Акмал Арслонович Холмуродовнинг ташаббуси ва кўмаги билан туман марказидаги стадион ҳамда унга ёндош спорт бинолари «Бунёдкор» академияси филиали ихтиёрига топширилди. Қисқа вақт ичида филиалимиз қошида «Бунёдкор-Дўстобод» жамоаси тузилиб, клуб Тошкент вилояти чемпионати, 2-лига баҳсларидаги иштирокини бошлади. Шу тариқа маҳаллий болалар катта футболга илк қадамларни филиалимизда қўйишлари, «Бунёдкор-Дўстобод» орқали профессионалга кириб бориш имкониятига эга бўлишди.