Bugun poytaxtimizda velotrek bo‘yicha yoshlar va kattalar o‘rtasida O‘zbekiston chempionati o‘z yakuniga yetdi. 26 oktyabr kuni start olgan ushbu musobaqa davomida Respublikamizning eng sara trek ustalari bor mahoratlarini namoyish qilishdi.

Ahamiyatlisi, bugun bo‘lib o‘tgan musobaqaning tantanali yopilish marosimi nafaqat sportchilar, balki O‘zbekiston velosiped sporti federasiyasi mutasaddilari uchun ham unutilmas tadbirga aylandi. Unda Rustam Shoabdurahmonov boshchiligidagi MOQ mutasaddilari, Jismoniy tarbiya va sport vazirligi vakillari, shuningdek, O‘zbekiston velosiped sporti federasiyaga biriktirilgan homiy “Asaka bank” ATBning mutasaddilari ham ishtirok etishdi. Tantanavor ruhda o‘tgan tadbirda federasiyaga MOQ nomidan zamonaviy “Wattbike” (uy sharoitida mashg‘ulot uchun foydalaniladigan elektron velosiped) topshirilgan bo‘lsa, “Asaka bank” tomonidan 2 ta yengil avtomobil “Nexia-3” va “Damas” sovg‘a qilindi. Ushbu yengil avtomobillar sportchilarimizning mashg‘ulot jarayonida murabbiylarimizning ishini ancha yengillashtirib, kerakli natijalarga erishishlarida xizmat qilishiga ishonamiz.

O‘z navbatida, federasiya bosh kotibi Kozim O‘rinboyxo‘jayev tadbirda so‘z olib, muhtaram Prezidentimiz boshchiligida sportga qaratilayotgan e’tibor, Olimpiya o‘yinlariga tayyorlanayotgan federasiyalarimiz hukumatimiz tomonidan har tomonlama qo‘llab-quvvatlanayotganini e’tirof etdi.

Shundan so‘ng musobaqalarning barcha yo‘nalishlarida g‘olib va sovrindorlarni taqdirlash marosimi bo‘lib o‘tdi.