«Andijon» klubi bosh murabbiyi Baxtiyor Hamidullayev iste’foga chiqarilgach, klub bosh direktori Diyorbek Mullajonov o‘z fikrlari bilan o‘rtoqlashdi.

"Biz jamoani qabul qilib olgan paytimizda jamoada holat yaxshi emas edi. Barchasini bo‘ynimizga olib jamoaning qarzlarini to‘lab berdik, futbolchilarni barcha muammolarni hal etib berdik. Kerak bo‘lsa mukofot pullari ham berdik, professional jamoaga xos tarzda sharoit yaratib berdik, ammo futbolchilarimiz bizga professional o‘yin namoyish etib bera olmadi. Futbol bunday bo‘lmaydi!

Bizga Superligada qolish vazifasi yuklatilgan. Baxtiyor Hamidullayev kelganidan so‘ng kerakli ochkolarni qo‘lga kiritganimizda ligada qolish imkoniyatimiz yuqori bo‘lar edi, afsuski, ochko ololmadik va Superligada qolish imkoniyatimiz kamayib ketdi. O‘yinlar kamligi bois yuqori pog‘onalarni so‘ramadik, ammo bu degani so‘nggi pog‘onalarda yurish kerak degani emas!

Bir inson qaysi sohada bo‘lishidan qat’iy nazar o‘zini ko‘rsatishi kerak bo‘ladi, o‘z sohasining ustasi bo‘lishi kerak. Bu yerda butun Andijon xalqining g‘ururi haqida gap ketmoqda. Raqib futbolchilari ham biznikilar kabi oddiy inson, ularni ham ikki qo‘li, ikki oyog‘i va bir boshi bor. Uch milliondan ortiq xalqni sharafini himoya qilish bunday bo‘lmaydi! Men yigitlar bilan jiddiy gaplashib oldim, endi buyog‘iga hech qanday bahona bo‘lmaydi, barcha futbolchilarimiz Andijon xalqi, xalqning sha’ni uchun maydonga tushishadi. To‘g‘ri qolgan o‘yinlarimiz oson bo‘lmaydi, ammo bu biz orqaga chekinamiz degani emas!

Balkim bu yil Superligada qola olmasmiz, ammo keyingi yil yoki yaqin 2-3 yil ichida biz kutgan, xalq kutgan, Andijon xalqi sog‘ingan futbolni yaratamiz", — dedi Diyorbek Mullajonov.