«Андижон» клуби бош мураббийи Бахтиёр Ҳамидуллаев истеъфога чиқарилгач, клуб бош директори Диёрбек Муллажонов ўз фикрлари билан ўртоқлашди.

"Биз жамоани қабул қилиб олган пайтимизда жамоада ҳолат яхши эмас эди. Барчасини бўйнимизга олиб жамоанинг қарзларини тўлаб бердик, футболчиларни барча муаммоларни ҳал этиб бердик. Керак бўлса мукофот пуллари ҳам бердик, профессионал жамоага хос тарзда шароит яратиб бердик, аммо футболчиларимиз бизга профессионал ўйин намойиш этиб бера олмади. Футбол бундай бўлмайди!

Бизга Суперлигада қолиш вазифаси юклатилган. Бахтиёр Ҳамидуллаев келганидан сўнг керакли очколарни қўлга киритганимизда лигада қолиш имкониятимиз юқори бўлар эди, афсуски, очко ололмадик ва Суперлигада қолиш имкониятимиз камайиб кетди. Ўйинлар камлиги боис юқори поғоналарни сўрамадик, аммо бу дегани сўнгги поғоналарда юриш керак дегани эмас!

Бир инсон қайси соҳада бўлишидан қатъий назар ўзини кўрсатиши керак бўлади, ўз соҳасининг устаси бўлиши керак. Бу ерда бутун Андижон халқининг ғурури ҳақида гап кетмоқда. Рақиб футболчилари ҳам бизникилар каби оддий инсон, уларни ҳам икки қўли, икки оёғи ва бир боши бор. Уч миллиондан ортиқ халқни шарафини ҳимоя қилиш бундай бўлмайди! Мен йигитлар билан жиддий гаплашиб олдим, энди буёғига ҳеч қандай баҳона бўлмайди, барча футболчиларимиз Андижон халқи, халқнинг шаъни учун майдонга тушишади. Тўғри қолган ўйинларимиз осон бўлмайди, аммо бу биз орқага чекинамиз дегани эмас!

Балким бу йил Суперлигада қола олмасмиз, аммо кейинги йил ёки яқин 2-3 йил ичида биз кутган, халқ кутган, Андижон халқи соғинган футболни яратамиз", — деди Диёрбек Муллажонов.