Angliya quyi divizioni vakili bo‘lgan «Nottingem Forest» futbolchisi Jon Bastok bir paytlar «Barselona»ga o‘tishi mumkin edi.

Buni futbolchining o‘zi «BBC Sport»ga bergan intervyusida ta’kidlab o‘tgan.
«14 yoshlik paytimda "Kristal Pelas" tarbiyalanuvchisi edim. Sevimli futbolchim Ronaldinyo bo‘lgan. Men unga o‘xshab "Oltin to‘p" sovrinlarini yutishni orzu qilganman. U bilan bir ikki marta ko‘rishganmiz ham. O‘yin uslubim yoqib qolganidanmi menga u xat yozgan edi: "Ronidan yosh Jonga". Shundan ko‘p o‘tmay transferim bo‘yicha "Barselona"dan klubimga taklif kelib tushgan. Bunda albatta, Ronaldinyoning hissasi katta edi. Lekin, shaxsiy sabablarimga ko‘ra, men Kataloniyaga ko‘chib o‘ta olmaganman. Biroq, xatni haliyam Londondagi uyimda saqlayman», - deydi futbolchi.

Eslatib o‘tamiz, Jon Bastok deyarli o‘n yildan ziyodroq faoliyati davomida o‘ndan ortiq klublarda o‘ynab chiqqan. U hozir «Nottingem Forest» jamoasida ijara asosida to‘p tepayotgan bo‘lib, transfer huquqi «Tuluza»ga tegishli.