“Navbahor U-21” yoshlar jamoasi U-21 Birinchiligida muvaffaqiyatli ishtirok etyapti va ayni paytda ushbu musobaqaning 22-turidan so‘ng 11 g‘alaba, 5 durang hamda 5 ta mag‘lubiyatni qayd etib, 38 ochko to‘plagan holda, turnir jadvalida 4-pog‘onani egallab turibdi.

Albatta, yoshlar jamoamizning mazkur zafarida murabbiylar shtabi, jumladan, Denis Toymensovning munosib hissasi bor. Ushbu mahoratli murabbiyni muxlislarga yaxshiroq tanishtirish maqsadida, Denis Toymensovdan intervyu oldik.  

– Denis, suhbatimizni U-21 Birinchiligining joriy mavsum bahslari borasidagi  fikrlaringiz bilan boshlasak. Bu yilgi musobaqa qanday o‘tyapti?

- Bu yilgi U-21 Birinchiligi juda kuchli va qiziqarli tarzda kechyapti. Jamoamiz ham mazkur chempionatda munosib ishtirok etishga harakat qilmoqda.

Shu yilning boshida klub rahbariyati, jumladan, aka-uka Otabek va Oybek Samatovlarning tashabbusi hamda sa’y-harakatlari bilan mahoratli yosh murabbiy Sherzod Jo‘rayev bilan birgalikda “Navbahor – U-21”ning bu yilgi o‘yinlari oldidan yoshlar jamoamizda o‘ynash uchun viloyatimizdagi ko‘plab futbolchilarni ko‘rikdan o‘tkazdik hamda ularning ichidan eng iqtidorli va mahoratlilarini tanlab oldik.

Bu esa o‘z mevasini beryapti va ayni paytda yoshlar jamoamiz U-21 Birinchiligining turnir jadvalida 4-pog‘onani egallab turibdi.

Ta’kidlash joizki, joriy mavsumda jamoamiz hali o‘z maydonida hech qaysi jamoaga imkoniyatni boy bermadi. Aksincha, Namangandagi bahslarda U-21 Birinchiligining kuchli jamoalari bo‘lgan “Paxtakor” (14-tur, 2:0) hamda “Nasaf” (17-tur, 3:2) klublarining yoshlar jamoalarini mag‘lubiyatga uchratishga muvaffaq bo‘ldik.

Shuningdek, bu yil U-21 yoshlar jamoamizdagi bir qator futbolchilar, jumladan, Husayn Ergashboyev, Sherzod G‘ulomjonov, Doston Abdulhayev hamda Mirzohid Mirzamahmudov “Navbahor”ning asosiy tarkibida o‘z debyutlarini nishonlashga muvaffaq bo‘lishdi va ayni paytda asosiy tarkib futbolchilari bilan mashg‘ulotlarda ishtirok etishmoqda.

Bundan tashqari, yoshlar jamoamiz darvozabonlari - Islomjon Abdullaxonov hamda Ulug‘bek Egamberdiyev, yarim himoyachi – Jamoliddin Bahromov ham asosiy tarkib a’zolari bilan mashg‘ulotlar o‘tkazishmoqda.

O‘z navbatida ta’kidlash joizki, bir qator shogirdlarim, jumladan, Islomjon Abdullaxonov, Sodiqjon Ortiqov va Ulug‘bek Aknazarov Timur Kapadze murabbiylik qilayotgan O‘zbekiston – U-19 yoshlar terma jamoasiga nomzod hisoblanishadi.

Aknazarov ushbu terma jamoaning so‘nggi o‘quv-mashg‘ulot yig‘inlari, jumladan, Tojikistondagi yig‘inida ham ishtirok etdi.

Maqsadimiz – “Navbahor”ning asosiy tarkibiga iqtidorli futbolchilarni yetkazib berish hamda buni amalga oshirish uchun jamoamiz murabbiylar shtabi bilan birgalikda qo‘limizdan kelganicha harakat qilyapmiz.

O‘z navbatida ta’kidlash joizki, “Navbahor – U-21” yoshlar jamoasida oldin mahoratli yosh murabbiy Sherzod Jo‘rayev bilan birga faoliyat olib borgandim. Keyinchalik Jo‘rayev “Navbahor”ning asosiy tarkibi murabbiylar shtabidan joy oldi. Hozir ham Sherzod aka menga o‘z maslahatlarini berib turibdi.

Shuningdek, ayni paytda yoshlar jamoamizning murabbiylar shtabida  bir paytlari o‘zimga ustozlik qilgan murabbiy Ravil Galeev hamda “Navbahor”ning sobiq futbolchisi, standart vaziyatlarni ajoyib tarzda amalga oshirgan, yosh murabbiy Alisher Mahmudov bilan birga faoliyat yurityapman.

Alisher aka mashg‘ulotlarda jamoamiz futbolchilariga standart vaziyatlardan samarali tarzda foydalanishni o‘rgatmoqda. Bu esa o‘z samarasini berib, kuchli zarbaga ega bo‘lgan mahoratli yarim himoyachi Sherzod G‘ulomjonov U-21 Birinchiligi bahslarida 4 ta golni aynan jarima zarbasidan urdi.

Qisqasi, yoshlar jamoamizning muvaffaqiyatlarida menga yaqindan yordam berayotgan Ravil Galeev va Alisher Mahmudovning ham munosib hissalari bor.

Fursatdan foydalanib, yosh murabbiy bo‘lishimga qaramay, menga yoshlar jamoasini boshqarishda  ishonch bildirgan klub rahbariyati, jumladan, aka-uka Otabek va Oybek Samatovlarga o‘z minnatdorchiligimni bildiraman. Ularning ishonchlarini oqlash maqsadida, o‘z ustimda izlanyapman, “Navbahor” murabbiylari, jumladan, No‘’mon Hasanovdan maslahatlar olib turibman.

O‘zim ham yangi yilda murabbiylik sohasi bo‘yicha “A” lisenziyasiga ega bo‘lish uchun o‘qiyman. Bu sohaga pog‘onama – pog‘ona kirib kelganman. Avval “S”, keyin esa “V” lisenziyasi bo‘yicha tahsil oldim.

Qisqasi, murabbiylik sohasini to‘liq o‘rganish uchun yanada izlanmoqchiman, o‘z ustimda ishlamoqchiman.

Umid qilamanki, kelasi mavsumda “Navbahor – U-21” yoshlar jamoasidan asosiy tarkib uchun bu yilgidan ham ko‘proq iqtidorli va mahoratli futbolchilar yetishib chiqishadi.

- Joriy mavsumda “Navbahor – U-21” yoshlar jamoasi kuchli uchlikdan o‘rin oladimi?

- O‘zingizga ma’lum, ayni paytda yoshlar jamoamiz U-21 Birinchiligining 4-pog‘onasida bormoqda. Uchinchi pog‘onadagi “Nasaf” jamoasidan 8 ochko kam jamg‘arganmiz. Ayrim bahslarda kerakli ochkolarni qo‘lga kirita olmadik. Masalan, U-21 Birinchiligining 22-turida Navoiyda “Qizilqum” jamoasi yoshlari ustidan g‘alaba qozonishimiz ham mumkin edi, lekin yakunda durangga erishdik (1:1).

Oldinda U-21 Birinchiligining yana 4 ta o‘yini bor hamda o‘sha bahslarda ijobiy natijalarni qayd etib, yakunda kuchli uchlikdan joy olish niyatimiz bor.

O‘z o‘rnida ta’kidlash joizki, klub rahbariyati, jumladan, “Navbahor” PFK vise-prezidenti Otabek Arifovich Samatov tomonidan jamoamizga barcha sharoitlar yaratib berilmoqda. Buning evaziga yoshlar jamoamiz musobaqada  ijobiy natijalarni qayd etmoqda, ta’kidalaganimdek, 4 nafar futbolchimiz asosiy tarkibda debyut qildi.

Mana, kuni kecha sobiq “Sport” mehmonxonasi binosi Namangan viloyat hokimi, viloyat futbol assosiasiyasi prezidenti   Shavkat Shokirjanovich Abdurazzoqovning tashabbusi bilan “Navbahor”ning farm va U-21 yoshlar jamoalari uchun qarorgoh (baza)ga aylantiriladigan bo‘ldi.

“Navbahor” klubi vise-prezidenti Otabek Samatov esa tashkil etiladigan yangi qarorgoh barcha zamonaviy talablarga talab beradigan holatda  ta’mirlanib, yangi zamonaviy jihozlar bilan ta’minlanishi, futbolchilar  uchun barcha sharoitlar yaratilishini ta’kidladi.

Ushbu xabar meni juda quvontirdi. Fursatdan foydalanib, yoshlar jamoamizni qo‘llab – quvvatlayotgan Namangan viloyat hokimi Shavkat Abdurazzoqov va klub vise-prezidenti Otabek Samatovga o‘z minnatdorchiligimni bildiraman va keyingi mavsumlarda yoshlar jamoamizdan “Navbahor”ning asosiy tarkibida o‘ynaydigan ko‘plab iqtidorli futbolchilar yetishib chiqishadi, degan umiddaman.

– U-21 Birinchiligining Toshkentda markazlashgan holda o‘tkazilgan 10-13-turlar bahslarida yoshlar jamoamiz 4 ta o‘yinning 3 tasida g‘alaba qozonib, bor-yo‘g‘i bitta uchrashuvda, ya’ni, AGMK yoshlariga imkoniyatni boy berdi, xolos (2:5). Bir so‘z bilan aytganda, yoshlar jamoamiz neytral maydondagi  o‘yinlarda 9 ochkoni qo‘lga kiritdi. O‘sha uchrashuvlarga shogirdlaringizni qanday ruhlantirdingiz?

– Murabbiylar shtabi bilan birgalikda yigitlarga har bir o‘yindan oldin kerakli ko‘rsatmalarni beramiz. Uchrashuv yakunlanganidan keyin esa ularga qayerda kamchilikka yo‘l qo‘yishganini tushuntiramiz.

Balki shuning uchun Toshkentdagi musobaqada yaxshi ishtirok etgandirmiz? Biroq ushbu turnirda yuz foizlik natijani ham qayd etishimiz mumkin edi. Biroq o‘yinlar oralig‘i qisqaligi bizga pand berdi.

11 – turdagi “Mash’al” yoshlariga qarshi kechgan o‘yinda ayrim yetakchi futbolchilarga dam berish lozim edi. Shunda AGMK yoshlarini ham mag‘lubiyatga uchratgan bo‘larmidik?

Bundan kerakli xulosa chiqarib, keyingi bahslarda bunday xatolarga yo‘l qo‘ymaslikka intildim.

- Denis, ko‘pchilik muxlislar siz haqingizda kam ma’lumotga ega. Shu bois, murabbiylik sohasiga qanday kirib kelganingiz borasida batafsil to‘xtalib o‘tsangiz...

- Bolaligimda “Navbahor” futbol maktabida tahsi olganman. Mazkur maktab tarbiyalanuvchilari “Markaziy” o‘yingohning zaxira maydonida mashg‘ulotlar olib borishardi. Futbolchilikdagi birinchi ustozim esa ta’kidlaganimdek, ayni paytda men bilan yoshlar jamoasida birga faoliyat olib borayotgan Ravil Galeev.

Futbolchilik faoliyatim davomida “Navbahor”ning o‘rinbosarlar tarkibida 4-5 yil o‘ynaganman. Keyin esa o‘sha paytda birinchi ligada ishtirok etgan “Chust” va “Yangiyer” jamoalarida to‘p surganman.

So‘ngra, murabbiylik sohasida tahsil olib, “Navbahor - Umid” futbol maktabi va Namangan olimpiya zaxiralari kollejida faoliyat olib bordim. O‘tgan yili “Navbahor – U-21” yoshlar jamoasiga taklif etishdi hamda o‘shandan buyon mazkur jamoada faoliyat olib boryapman.

- U-21 Birinchiligi yakunlanishiga bor-yo‘g‘i 4 ta tur qoldi. Ortda qolgan bahslarda siz uchun qaysi o‘yin eng alamli bo‘ldi?

- Safarda “Metallurg” yoshlari (6-tur, 1:3) bilan bo‘lgan o‘yin. O‘sha bahsda shogirdlarim  2 ta penaltini amalga oshira olishmagandi. Natijada 1:3 hisobida mag‘lubiyatga uchragandik.

- Joriy mavsumda siz uchun qaysi o‘yinlar eng esda qolarli bo‘ldi va yaxshi taassurot qoldirdi?

- O‘z maydonimizda “Paxtakor” va “Nasaf” yoshlariga qarshi kechgan bahslar menda yaxshi taassurot qoldirgan.

Garchi mazkur o‘yinlarda zafar quchgan bo‘lsak-da, o‘sha g‘alabalarga qiyinchilik bilan erishganmiz.

- Muxlislarga tilaklaringiz...

- Futbolda ishqibozlarning o‘rni katta ahamiyatga ega. Muxlislar futbolchilarga qo‘shimcha ruh va motivasiya bag‘ishlashadi hamda ular maydonga o‘zgacha ishtiyoqda tushishadi.

Ishqibozlardan “Navbahor”ning asosiy hamda yoshlar jamoalarini doimo qo‘llab-quvvatlashlarini tilab qolaman.

Baxtimizga muxlislar doimo sog‘-salomat bo‘lishsin!

Bizning ma’lumot

Denis Toymensov – 1988 yil, 27 sentyabrda Namangan shahrida tug‘ilgan. Futbol bilan 8 yoshidan buyon shug‘ullanadi.
Ampluasi – himoyachi.
O‘ynagan jamoalari: “Navbahor” (Namangan, o‘rinbosarlar) – 2006 – 2009 yillar, 2010 yilning 2-davrasi, “Chust” (Chust, 2010 yilning 1-davrasi), “Yangiyer” (Yangiyer, 2011 yil).
Namangan Davlat Universitetining “Jismoniy tarbiya” fakultetini tamomlagan.  
2012 yildan buyon murabbiylik faoliyati bilan shug‘ullanadi.
2019 yildan “Navbahor – U - 21” yoshlar jamoasida faoliyat olib bormoqda.
Oilali, bir farzandning otasi.
Muxlislik qiladigan jamoalari: “Spartak” (Moskva) va “Barselona” (Ispaniya).
Ispaniyalik yarim himoyachi Andres Inyestaning o‘yinlarini tomosha qilishni yoqtiradi.

“Navbahor” PFK matbuot xizmati.