Coca Cola Superliga 23-turidan o‘rin olgan “Navbahor” – “Surxon” (1:0) uchrashuvidan keyingi matbuot anjumanining ikkinchi qismida “Navbahor” bosh murabbiyi vazifasini bajaruvchi No‘’mon Hasanov ishtirok etib, OAV xodimlarining savollariga javob berdi. Jamoamiz ustozi so‘zini uchrashuv haqidagi fikrlari bilan boshladi.

- Avvalo bugungi g‘alaba bilan barchani, ushbu yutug‘imizda munosib hissalari bo‘lgan viloyat hokimi, klub rahbariyati, klubimiz homiylari, shuningdek, muxlislar hamda yaxshi o‘yin namoyish etgan futbolchilarni tabriklayman.

Bugungi g‘alaba yigitlarga qo‘shimcha ruh bag‘ishlaydi, degan umiddaman. Chunki qatorasiga 3ta uchrashuvdan buyon zafar quchyapmiz. Hali oldinda Superliga va O‘zbekiston kubogi o‘yinlari bor hamda g‘alabalarimiz bardavom bo‘ladi, degan niyatdaman.

Bugungi o‘yin borasida gapiradigan bo‘lsam, uchrashuv juda yoqdi. To‘g‘ri, kichik hisobda g‘alaba qozondik. Biroq, futbolchilar berilgan ko‘rsatmalarga amal qilgan holda, to‘pni bir-birlariga aniq oshirgan holda, rohatlanib, to‘p surishdi. Uchrashuvning birinchi bo‘limida jamoamizda ko‘plab imkoniyatlar yuzaga keldi. Hattoki, penaltini ham urolmadik. Lekin, bu bir tarafdan yaxshi ham bo‘ldi. Boisi, futbolchilar 2-bo‘limda maydonga xuddi hisob 0:0 bo‘lganidek, chiqishdi hamda yakunda g‘alaba qozonishga muvaffaq bo‘lishdi.

- Yaqinda O‘zbekiston kubogi musobaqasiga qur’a tashlandi va unda “Navbahor”ning mazkur turnirdagi ilk raqibi ma’lum bo‘ldi. Jamoaning kubok musobaqasidagi maqsadi qanday?

- Albatta, O‘zbekiston kubogini qo‘lga kiritish.To‘g‘ri, qur’adagi ilk raqibimiz quyi liga vakili “Oqtepa” bo‘ldi. Ammo bu raqibga ham yengil qaramaslik kerak. Chunki bitta gol urib, himoyaga yotib olishi ham mumkin. Shuning uchun,o‘sha o‘yinga ham munosib tayyorgarlik ko‘ramiz. Maqsadimiz, har bir bahsda maydonga g‘alaba ishtiyoqida tushish.

- Keyingi mavsumda ham “Navbahor”da bosh murabbiy sifatida faoliyat yuritasizmi? Ivan Solovyovning jamoadan ketishi, bugun uning “Navbahor”da oxirgi o‘yini bo‘lganligi borasida gap-so‘zlar bo‘lmoqda.Bu haqda nima deya olasiz?

- Birinchi savolingizga kelsak, “Navbahor” klubi bilan joriy mavsum yakuniga qadar shartnoma imzolaganman.SHuning uchun kelasi yili jamoada ishlashim borasida aniq gap ayta olmayman.

Ivan Solovyov to‘g‘risida to‘xtaladigan bo‘lsam, uning klub bilan amaldagi shartnomasi bor. Shartnomasi bor futbolchi esa o‘zingizga ma’lum, hech qayoqqa keta olmaydi.

Mabodo kelasi mavsumda ham “Navbahor”da faoliyat yuritadigan bo‘lsam,Solovyovni jamoada qoldirgan bo‘lardim.CHunki o‘zinglar guvohi bo‘lyapsizlar, u maydonda ancha jonkuyar va yaxshi texnikaga ega. Bunday futbolchilar esa kam.

So‘zim yakunida muxlislardan futbolchilarni qo‘llab-quvvatlashlarini so‘rayman. Ayrim ishqibozlar futbolchilarni haqoratlashmoqda. Masalan, bugun ham g‘alaba qozongan bo‘lsak-da, 3-4 yigitlar muxlislar haqoratlashganini ta’kidlab, xafa bo‘lib o‘tirishibdi. Bilmadim, “Navbahor”ning yutqazishini istaydigan ishqibozlar ham bormi? Bunday muxlislar stadionga kelishmasa ham mayli. Futbolchilar ishqibozlarga quvonch ulashish uchun maydonga tushishadi. Shuning uchun muxlislardan doimo, har qanday holatda ham o‘yinchilarni qo‘llab- quvvatlab,ularga qo‘shimcha kuch-quvvat va ruh bag‘ishlashlarini iltimos qilaman.

“Navbahor” PFK matbuot xizmati.