O‘zbekiston Pro-ligasi teletranslyasiyalari o‘tgan davr ichida bizga qiziq voqealarni taqdim etdi. PFL va Futbol TV hamkorligining mevasi bo‘lgan bu jarayon O‘zbekiston futbolining o‘rganishga eng muhtoj hududi bo‘lgan Pro-ligani yuzaga olib chiqdi. Biz oxirigacha kurash olib boradigan, sun’iy hisoblardan holi bo‘lgan futbolni yaqindan ko‘rdik, tanidik. Sakkiz jamoa ishtirikidagi o‘yinlar intriga e’tibori bilan o‘zidan yuqoridagi ligadan o‘ta oldi, nazdimda. Bu fikrni to‘g‘ridan-to‘g‘ri yo‘llanma masalasi so‘nggi uchrashuvda hal bo‘lishi ham isbotlaydi.

"Turon" — Yaypanning mazkur klubi Respublikani ajablantirdi. Bu o‘rinda o‘zgacha ishtiyoq, ishning o‘z egalariga topshirilishi, o‘z o‘rniga qo‘yilishi natija berdi, deya olamiz. Agar boshlangan ish shu maromda davom etsa "Turon" o‘zidan keyin paydo bo‘lishi kutilayotgan qilinayotgan xususiy klublarga umid bo‘la oladi.

"Neftchi" — O‘zbekistonning eng sovrindor ikki klubidan biri. Ulkan tarixi doim ta’qib qilib keladigan jamoa. Avval boshidan favorit edi. Ammo, ligadagi raqobat barchasini erta hal etish uchun to‘siq bo‘ldi. Endi ular o‘z maydonlarida "Turon"ga mag‘lub bo‘lmasliklari lozim.

Futbol TV esa yana xizmatda bo‘ladi. KTS xodimlari, sharhlovchilar Xayrulla Hamidov va Davron Fayziyev Farg‘onadan o‘yinda ishlashadi.

Bu o‘yin koronavirus pandemiyasi davrida o‘tgan o‘zbek futbol mavsumining chiroyli xotimasi bo‘ladi, nasib qilsa. Demak, birga kuzatamiz.


"Neftchi" - "Turon"
Futbol TV, soat 14:00!

Farg‘onada tong otsin, hammasini ko‘ramiz....

Orif Tolipov.