Braziliyaning «Vasko da Gama» klubi sport direktori Fabio Kordella italiyalik hujumchi Mario Balotelli bilan ehtimoliy shartnoma haqida fikr bildirdi.

«U bu yerga kelishni xohladi. «Vasko» – sovrinlarni qo‘lga kiritish borasida «Real»dan keyin dunyoda ikkinchi o‘rinda turishini unutmang!

Mario biror bir ahmoqlik qilish uchun Rioga keladi deb o‘ylamayman. U yetuklikka erishgan futbolchi deb hisoblayman. «Vasko» irqchilikka qarshi kurashadigan klub sanaladi. Umid qilamanki, u biz bilan shartnoma imzolashni kutib turadi.

Umuman olganda ikki tomon kelishuvga erishdi, faqat rasmiyatchilik qoldi xolos. Umid qilamanki, u bilan 15 yanvargacha shartnoma imzolaymiz. «Vasko»ga Balotellidek futbolchi kerak, Balotelliga esa «Vasko»dek klub kerak. U bizning muxlislar uchun xuddi Maradona bo‘ladi», – dedi sport direktor Goal portaliga.

Ayni paytda Balotelli erkin agent sanaladi. 30 yoshli italiyalik hujumchining so‘nggi klubi Italiyaning «Breshia» klubi bo‘lgandi.