Angliya Premer-ligasi yosh futbolchilar bilan shartnoma imzolashning yangi qoidalarini joriy qildi.
2021 yil 1 yanvarda Buyuk Britaniya Yevropa Ittifoqini tark etishi munosabati bilan ingliz klublari yosh futbolchilar bilan shartnoma imzolash qoidalarini o‘zgartirmoqda. Shunday qilib, yangi qoidalarga ko‘ra, Premer-liga klublari 18 yoshgacha bo‘lgan futbolchilarni sotib ololmaydi.
Bundan tashqari, boshqa cheklovlar ham mavjud. Masalan, qoida kuchga kirganidan so‘ng, ingliz klublari bitta transfer oynasida 21 yoshga to‘lmagan uchtadan ko‘p futbolchini sotib ololmaydi.
Buyuk Britaniyada o‘ynash huquqiga ega bo‘lish uchun futbolchilar ma’lum miqdordagi ochkoga ega bo‘lishlari kerak.
Terma jamoada o‘tkazilgan o‘yinlar uchun ochkolar olinadi va terma jamoaning FIFA reytingidagi o‘riniga asoslanadi. Ushbu qoidalar keyingi transfer oynasida qo‘llaniladi.
