O‘zbekiston kubogining chorak final bosqichidan o‘rin olgan "finaldan oldingi final" Namanganda bo‘lib o‘tdi. “Navbahor” va “Nasaf” jamoalari o‘rtasidagi o‘yin, tuman tushganiga qaramay, ancha qizg‘in kechdi.

Bahsning 15-daqiqasida Bobur Abduxoliqov maydon markazda Azim Ahmedovdan to‘pni olib qo‘yib, qarshi hujumni boshladi. Marko Stanoyevich esa jamoadoshidan to‘pni qabul qilib, jarima maydoniga kirib bordi va aniq zarba hisobni ochdi.

Tanaffusga qadar to‘p nazorati mezbonlar tarafida bo‘lsa-da, qarshiliklarning qarshi hujumlari xavfli bo‘ldi. Shunday vaziyatlarning birida Kenjaboyev sherigi Abduxoliqovga o‘z vaqtida pas bermagani uchun o‘ta qulay imkoniyat havoga sovurildi.

Ikkinchi bo‘limda Ro‘ziqul Berdiyev shogirdlari tartibli himoyalanishga harakat qilishdi. Ular asosiy vaqtning o‘zida g‘alabaga yaqin turishgan edi. O‘yinga qo‘shib berilgan 4 daqiqa tugashiga 5-10 soniya qolganida hakam "Nasaf" darvozasi tomon 18-20 metrlardan bahsli jarima zarbasi belgiladi. Bu esa Ro‘ziqul Berdiyevning keskin noroziligiga sabab bo‘ldi. Murabbiyning asabiylashganicha bor ekan, Shohrux Mahmudhojiyev aniq zarba bilan to‘pni "to‘qqizlik"ka "mixlab" qo‘ydi.

Shu tariqa, o‘yin qo‘shimcha bo‘limlarga o‘tdi. Quyuq tuman ostida boshlangan qo‘shimcha vaqtning ikkinchisi boshlangan paytda qarshiliklar kombinasiya orqali jarima maydoniga kirib kelishdi va zaxiradan maydonga tushgan Husayn Norchayev "Navbahor" darvozasini ishg‘ol qildi.

Ushbu gol o‘yinda so‘nggisi bo‘lib qoldi. Natijada "Nasaf" O‘zbekiston kubogi yarim finaliga yo‘l oldi.

O‘zbekiston kubogi, chorak final.
«Navbahor» - «Nasaf» - 1:2. Asosiy vaqt — 1:1
Gollar: Shohrux Mahmudhojiyev (90+5) — Marko Stanoyevich (15), Husayn Norchayev (107)
«Navbahor»: 1.O‘tkir Yusupov, 4.Ehsoni Panshanbe, 7.Azimjon Ahmedov (S), 9.Ivan Solovyov, 10.Azizbke Turg‘unboyev, 18.Sardor Telyakov, 19.Mirzohid G‘ofurov, 20.Davronbek Hoshimov, 22.Igor Golban, 27.Islom Rashidxonov, 95.Zabihillo O‘rinboyev
«Nasaf»: 35.Abduvohid Ne’matov, 4.Husniddin Aliqulov, 5.G‘olib G‘aybullayev, 10.Bobir Abdixoliqov, 14.SHarof Muhitdinov, 15.Jo‘rabek Mannonov, 20.Islom Kenjaboyev, 22.Akmal Mozgovoy, 77.Oybek Bozorov, 88.Marko Stanoyevich, 92.Umarbek Eshmurodov (S)