Xalqaro futbol assosiasiyalari kengashi (IFAB) bir qator futbol qoidalariga o‘zgartirish kiritilishi haqida ma’lum qildi.

Unga ko‘ra, beshta zaxira almashtirish qoidasi muddati yana uzaytirildi. Milliy musobaqalarda uning amal qilish muddati 2021 yilning dekabriga qadar qilib belgilandi, xalqaro musobaqalarda esa 2022 yilning 31 iyuliga qadar amalda bo‘ladi. Bunga sabab qilib koronavirus pandemiyasining ta’siri davom etayotgani ko‘rsatilgan.

IFAB miya chayqalishi bilan bog‘liq jarohatlar vaqtida qo‘shimcha almashtirish amalga oshirish qoidasini 2021 yilning yanvaridan boshlab sinovdan o‘tkazishni boshlaydi. Uchrashuv vaqtida futbolchida miya chayqalishi kuzatilsa yoki shunga gumon bo‘lsa, u holda qo‘shimcha almashtirishga ruxsat etiladi. Almashtirish butun o‘yin davomida amalda bo‘ladi, futbolchi aniq tashxis ma’lum bo‘lmagunga qadar maydonga qo‘yilmaydi

Eslatib o‘tamiz, koronavirus pandemiyasi sabab to‘xtab qolgan musobaqalar restartidan so‘ng o‘yinchilarning jarohat olish ehtimolini pasaytirish uchun mazkur qaror qabul qilingandi. Iyul oyida uni 2020/21 yilgi mavsum oxirigacha uzaytirish belgilangandi.