Халқаро футбол ассоциациялари кенгаши (IFAB) бир қатор футбол қоидаларига ўзгартириш киритилиши ҳақида маълум қилди.

Унга кўра, бешта захира алмаштириш қоидаси муддати яна узайтирилди. Миллий мусобақаларда унинг амал қилиш муддати 2021 йилнинг декабрига қадар қилиб белгиланди, халқаро мусобақаларда эса 2022 йилнинг 31 июлига қадар амалда бўлади. Бунга сабаб қилиб коронавирус пандемиясининг таъсири давом этаётгани кўрсатилган.

IFAB мия чайқалиши билан боғлиқ жароҳатлар вақтида қўшимча алмаштириш амалга ошириш қоидасини 2021 йилнинг январидан бошлаб синовдан ўтказишни бошлайди. Учрашув вақтида футболчида мия чайқалиши кузатилса ёки шунга гумон бўлса, у ҳолда қўшимча алмаштиришга рухсат этилади. Алмаштириш бутун ўйин давомида амалда бўлади, футболчи аниқ ташхис маълум бўлмагунга қадар майдонга қўйилмайди

Эслатиб ўтамиз, коронавирус пандемияси сабаб тўхтаб қолган мусобақалар рестартидан сўнг ўйинчиларнинг жароҳат олиш эҳтимолини пасайтириш учун мазкур қарор қабул қилинганди. Июль ойида уни 2020/21 йилги мавсум охиригача узайтириш белгиланганди.