Futbol oilasidagi “Yilning eng yaxshilarini taqdirlash” marosimi bo‘lib o‘tdi. Tadbir haqida aytishganida “Bunday marosimlarda uzoq yillardan buyon e’tibordan chetda qolib kelayotgan futbol shifokorlari “koronavirus sharofati” bilan, pandemiya davridagi kamtarona xizmatlari uchun, hech bo‘lmasa bu yil e’tirof etilar ekan-da”, degan o‘y o‘tgandi xayolimdan.

Chuchvarani xom sanagan ekanmiz. Tadbirda, turli nominasiyalarda taqdirlashdi. Ular o‘z yo‘liga..., ammo zamon zayli bilan shifokorlar millat qahramoni sifatida ardoqlanayotgan bugungi davrda, kasallik o‘chog‘ida ishlayotgan shifokorlardan qolishmay, uyi – oilasi oldiga bormay, murabbiyu futbolchilar yashayotgan “baza”da istiqomat qilib, kechayu-kunduz ularning issiq-sovug‘idan xabardor bo‘lgan jamoa shifokorlaridan birortasi ushbu tadbirga taklif qilinmadi. Nominasiya haqida-ku gapirmasa ham bo‘ladi (“Rubin” shifokori o‘yin mahali tez tibbiy yordam ko‘rsatgani uchun olgan sovrinning bu mavzuga umuman aloqasi yo‘q).

Pandemiya davrida chempionatni davom ettirish yo‘lida, kasallik avj olgan jamoani “oyoqqa turg‘uzish” uchun fidokorona mehnat qilgan (hech qanday qo‘shimcha mablag‘ yoki rag‘batlantirishlarsiz) “Bunyodkor” shifokori Qahramon Nurmuhammedov, AGMK shifokori Islom Abayev, “Paxtakor” vrachi Umid Bahromov , “Metallurg” shifokori Dilshod Ashirov hech bo‘lmaganda umumiy e’tirofga loyiq edilar.

Shifokorlarimiz marosimlarga chaqirilishlari yoki mutasaddilar ularning qo‘lini siqib qo‘yishi uchun ishlashmaydi, ularga sovrinning ham keragi yo‘q aslida. Mehnatlarining unumi ular uchun sovg‘a. Ammo bir og‘iz tashakkur va beminnat mehnatlarining e’tirofi ularga yanada g‘ayrat va kuch bag‘ishlashi aniq edi.

Barcha jamoa shifokorlari va ularning xizmatlarini bilguvchi kaminaning mutasaddilardan bir iltimosim bor. Biz futbol shifokorlari ichida, pandemiya davrida eng ko‘p ter to‘kishgan va munosiblarimiz – yuqorida nomlari keltirilgan shifokorlarimizning klublariga aqalli “tashakkurnoma” yo‘llab qo‘ysalar insofdan bo‘lur edi.  

Abror Pirriyev.
"Lokomotiv" klubi va O‘zbekiston terma jamoasi shifokori.