WhoScored portali A Seriya 16-turi doirasida 6 yanvar kuni bo‘lib o‘tgan «Sassuolo» — «Jenoa» uchrashuvidan (2:1) keyin futbolchilar reytingini e’lon qildi.
Unga ko‘ra genuyaliklarning yagona goliga mualliflik qilgan Eldor Shomurodov 7,9 ballga ega bo‘ldi. Bu «Jenoa» vakillari orasidagi eng yaxshi natija bo‘lish bilan birga, uchrashuvdagi ikkinchi eng yaxshi reyting bo‘ldi. O‘zbekistonlik futbolchidan faqat gol va golli uzatma muallifiga aylangan Jeremi Boga (8 ball) yaxshiroq natija qayd etdi.
Uchrashuvda 90 daqiqa harakat qilgan Shomurodov jami 43 marta to‘pga tegindi. Uning 21 uzatmasidan 14 tasi aniq chiqdi (67%). Maydondagi yakkakurashlarning 12 tasidan 5 tasida g‘olib chiqdi, havoda esa 10 tadan 4 ta.
Shomurodov A Seriya 2020/21 yilgi mavsumida 10 ta o‘yinda ishtirok etib, ikkita gol va bitta golli uzatmaga muallif bo‘ldi.
