Kecha Qirg‘iziston Respublikasining Batken va O‘sh viloyati futbol assosiasiyalari vakillari Farg‘ona viloyatiga tashrif buyurdi.
Tashrifdan asosiy maqsad Qirg‘izistonning mazkur viloyatlari hamda Farg‘ona viloyati futbol assosiasiyalari o‘rtasidagi hamkorlik aloqalarini rivojlantirish, futbol orqali xalqlar do‘stligini yanada mustahkamlash, futbol mutaxassislari va jamoalari o‘rtasida o‘zaro tajriba almashish amaliyotini yo‘lga qo‘yishdan iborat.
Qirg‘izistonlik mutasaddilar, murabbiy va hakamlardan tarkib topgan delegasiya dastlab Farg‘ona shahridagi “Futbol markazi”da bo‘lishdi hamda u yerda yaratilgan sharoitlar va viloyat futbol assosiasiyasi ish faoliyati bilan yaqindan tanishdi.
Tashrif yakunida O‘sh va Batken hamda Farg‘ona viloyati futbol assosiasiyalarining kelgusidagi o‘zaro hamkorlik qilish bo‘yicha qo‘shma Memorandumi imzolandi.