2017-yil 5-may sanasida tashkil etilgan «Turon» o‘sha mavsumning o‘zida «Navro‘z» kubogi musobaqasida g‘oliblikni qo‘lga kiritdi. 2018-yilda tajribali mutaxassis Bahrom Xakimov qo‘l ostida jamoa futbol bo‘yicha Farg‘ona viloyati birinchiligi 2-liga musobaqalarida chempion bo‘ldi.

«Turon» 2019-yilgi mavsumda Farg‘ona viloyati 2-ligasi g‘olibi sifatida O‘zPFL bayrog‘i ostidan tashkil etiladigan PRO-Liga (V guruhi) ishtirokchisiga aylandi.

Mavsum avvalida keyin Bahrom Xakimov, keyinroq Islombek Ismoilov qo‘l ostida jamoa mazkur ligada jami 28 ta o‘yin o‘tkazgan jamoa 19 ta g‘alaba, 5 durang, 4 mag‘lubiyat qayd etgan xolda 62 ochko bilan chempionlikni qo‘lga kiritdi. To‘plar nisbati — 67-23, raqiblar darvozasi 67 bor ishg‘ol etilgan bo‘lsa, o‘z darvozasidan 23 ta to‘p o‘tkazib yuborilgan. O‘sha mavsumning o‘zida PRO-Liga o‘tish o‘yinlarida ham barcha raqiblarini mag‘lub etgan «Turon» g‘oliblikni qo‘lga kiritdi.

Jamoa 2020-yilgi mavsumda PRO-Liga musobaqalarida ham munosib ishtirok etdi. Islombek Ismoilov boshqaruvidagi «Turon» jami 20 ta uchrashuvda maydonga tushgan «Turon» 11 g‘alaba, 5 durang, 4 mag‘lubiyat qayd etgani xolda 38 ochko jamg‘arib g‘oliblikni qo‘lga kiritdi. Endilikda jamoa 2021-yilgi mavsumdan boshlab O‘zbekiston Superligasida ishtirok etadi.

Aytish joiz, klubning yosh hujumchisi Abdulazizxon Abdurashidov 2020-yilgi mavsum yakunlariga ko‘ra, «PRO-Liganing eng yaxshi futbolchisi» deb topilgan bo‘lsa, «Turon» O‘zPFL tomonidan «Maxsus sovrin» nominasiyasi g‘olibi sifatida taqdirlandi.

«Turon» futbol klubi matbuot xizmati