"Bunyodkor" mashg‘ulotlarida ishtirok etayotgan nigeriyalik Ibrohim Tomiva «Hokim Kubogi»da hali o‘z hisobiga gol yozib qo‘ymagan bo‘lsada, o‘zining kutilmagan qarorlari va zarbalari bilan raqib o‘yinchilarini shoshirib qo‘ygani rost. Bugun bo‘lib o‘tadigan «Neftchi-2»ga qarshi bahs oldidan hujumchining fikrlari bilan qiziqdik.

- Musobaqa doirasida ikkita o‘yinda maydonga tushdik. Birinchi bahsda jamoaviy o‘yinimiz «o‘xshamadi». Maydonning holatidanmi yoki raqibni darajasidanmi, harakatlarimiz qovushmadi. O‘ynadik, lekin o‘xshamadi, bu ruhiyat bilan ham bog‘liq. Ikkinchi uchrashuvda endi hammasi iziga tushdi. Futbolchilar maydonda borini berib harakat qildi va o‘yinimiz ham qovushdi. Agar hamma bellashuvda shunday harakat qilsak bemalol ko‘zlangan maqsadga erisha olamiz. «Bunyodkor» kuchli jamoa, tarkibda iqtidorli futbolchilardan tashqari, tajribali o‘yinchilar ham bor. Barcha bahslarda yuz foiz kuch bilan o‘ynasak, biz juda kuchli jamoaga aylanamiz. Musobaqa uchun ajratilgan maydonning holati yomon. «Bunyodkor» ko‘proq to‘p uzatishlar orqali o‘yin tashkil qiladi. Bunday jamoaga o‘z-o‘zidan yaxshi maydon kerak. Biz ikkita uchrashuv o‘tkazgan maydoning holati bunga yo‘l qo‘ymadi. To‘p jamoadoshingizga yetib bormaydi, sakrab ketadi. Natijada o‘zimiz xohlagan o‘yinni namoyish qilishni qiynalyapmiz.