«Hokim Kubogi»ning guruh bosqichi 3-turidan o‘rin olgan «Neftchi-2» - «Bunyodkor» (0:1) uchrashuvidan keyin mezbonlar ustozi Aziz Alijonovning fikrlari bilan qiziqdik.

- Yaxshi uchrashuv o‘tkazdik. Baribir «Bunyodkor» kuchli jamoa, qolaversa Superliga ishtirokchisi. Tarkibida milliy terma jamoaga nomzod futbolchilar bor. Bizning tarkibdagi bolalarning aksari hali 17 yoshni qarshilamagan. Shuning uchun shogirdlarimda hayajon yaqqol sezilib qoldi. Kuni kecha televizorda ko‘rib yurgan futbolchilarga qarshi maydonga chiqishgani uchun hayajonga tushishdi. Shuningdek, avval ikki o‘yinda katta kuch sarflaganimiz ham bugun o‘z so‘zini aytdi. «Bunyodkor» kuchli bo‘lsa-da, shogirdlarimni maydonga tushib  borlarini berishlarini, durang ham yaxshi natija ekanligini tushuntirgandim. Ikkinchi bo‘limda biroz omadimiz kelmadi, deya olaman. Vaziyatlardan foydalana olmadik, ammo baribir ko‘proq tajriba o‘z so‘zini aytdi.

Umumiy ma’noda musobaqadagi ishtirokimizdan ko‘nglimiz to‘ldi. To‘g‘ri, dastlabki ikki turdan keyin peshqadam bo‘lib, so‘nggi turda kichik hisobda yutqazib, uchinchi o‘ringa tushib ketish biroz alamli, lekin turnir baribir shogirdlarimga katta maktab vazifasini o‘tab berdi. Asosiy tarkibga besh nafar shogirdim chaqirildi. Kechagi bahsda maydonga tushishdi, asosiysi shu.